ديوان الشاعر/لافي بن نفجان الحربي

انا شاقني يابو فهـد فـزت الفكسـار=بعد ماطرق ستين زود ٍ علـى الميـه
تنهض تنهض فارسـي ٍ طلـع لطيـار=على كف ابن شقران في عمق وسميه
على كف ابو نايف ولد وافي الاشبـار=زبون الخساير فـي مشاريـع خيريـه
عسى والدينه مابهم من تجيـه النـار=وعسى سية اللي يبذل الجـود ممحيـه
واعود على الفكسار واكمل المشـوار=كمال الوصوف السبع لوحه سعوديـه
تحدى الدريول يوم جنب طريـق القـار=مشى مع صحاري مابها طرق ممشيه
رفع مقدمه يشبه لذيب ٍ زبـن سنـار=خفـي الجنـازه ناولـه طلقـة ٍ حيـه
يهقويك بالفرجه صبور ٍ على الجبـار=زعول ٍ على اللي فيـه كنـه وماويـه
عليه الحلايا من هكا الفارس المغـوار=قوي المهابـه فيـه نخـوه عروبيـه
غيور ٍ سمع صيحة ونخوة حريم الجار=وريث الشجاعه والشرف والشهاميـه
تعزوى وسل الصارم الحاسـم البتـار=عـزوم ٍ علـى فعلـه بغيـره بدويـه
خياله اليا عرض عرف صل ٍ ربا باقفار=يمـارس نفـوذه بيـن حديـن بريـه
تلويه مع عرق ٍ ثقيل وكبيـر اشجـار=تلوي حنيش ٍ صايل ٍ بـأرض قفريـه
وتهنفل هنوف مشيها يلفـت الانظـار=طموح ٍ عن الطامن عن الشين محميه
حسبها رفيع ٍ وبنت قوم لهـم مقـدار=عيوف وعفيفة نفـس ماهـي دوينيـه
نشت بالكرامه مالها بالجـواز اسفـار=تربـت بنجـد ولا تطـالـب بحـريـه
عليها وصايف مهرة ٍ قادهـا السبـار=نسبها الصويتي من مرابـط صويتيـه
قدم بيرق ٍ يتلي زعيـم ٍ بعيـد اذكـار=عشية خوير الخمس شـرق الدليميـه
زعيم ٍ مشى للخصم واسرع برد الثـار=على شان تبقى خيمـة العـز مبنيـه
تمارج فلي الخيل من عزوته لا غـار=خذا الاولـه والاخـره غصـب كيديـه
شجاع ٍ بدس الطير خلى الكبار صغـار=بقت عزوته وحده مع النـاس فرديـه
تخيلت وصف الجيب بالحـر والاخيـار=وعلى الذيب الاسحم والحنش والسنافيه