ديوان الشاعر/ سعد المحمدي

بمزاين البـل عنـد راع الجمايـل = يامرحبـا عـداد ماغـرد الطيـر
ترحيب وافي فـي جميـع القبايل = احلا من السكـر ودر المصاغيـر
عميـت بالترحيـب كـل الحمايـل = في حفل ابو خالدعشيـر المناعيـر
رابح ولد غازي حميـد الخصايـل = اللـي يرحـب لالفـوه المساييـر
قرم العيـال اللـي يشيـل الثقايـل = لاجاء لزومه مايحسـب المخاسيـر
راع العطى ريف الركاب الهزايـل = يـوم الليالـي ينشـامـا مدابـيـر
ترفع له البيضاء على كـل طايـل = يستاهل البيضـاء قليـل المعاذيـر
بك نفتخر ياشوق ظـاف الجدايـل = بيـن القبايـل يابعيـد المسابـيـر
وان كان عـادة للفعـول الاوايـل = ربعك رويثـه يحتمـون الطوابيـر
اليا عتلوا فـوق المهـار الاصايـل = كم فارساً خلـوا عظامـه شعاثيـر
زمل الحمول مروضه كـل عايـل = ا ن جاء نهاراً فيـه شـراً بلاخيـر
يـوم السنيـن الماضيـه والفعايـل = ياماثنـوا بالشلـف دون المظاهيـر
والضيف له مع شرحة البال حايـل = يجلس على جال الـدلال المباهيـر
قصيرهـم لوكـان جرفـاً مهايـل = له عندهم حشمـه وشيمـه وتقديـر
وخويهـم لاصـار قـدح الفتايـل = يقفـون دونـه بالقنـا والبواتـيـر
من قال لي غلطان جبـت الدلايل = ماقلت له عنـدي دلايـل وتفسيـر
هذا والاهضـم حـق كـل القبايـل = الناس مثل الناس من دون تقصيـر
الطيـب عـداً مـادمـه نثـايـل = ولاكل حبل يوصلـك جمـة البيـر
مايـارده ياكـود راعـي صمايـل = قرماً لكسـب الطيبـه دايـم مغيـر
والا الـردي عنهـا ينـام القوايـل = عنـد الـوازم والشدايـد معيثيـر
وقت الرخى جامع لكـل المسايـل = وان صملوا بالراى ضمن الغناديـر
اعـود للبـل يارجـال الجـزايـل = سبحان من صخر لنا الابل تصخير
وقتاً مضى هي عظمنـا والرحايـل =قـدام ماتعلـف نخالـه وشعـيـر
لاقام يبرق فـي حقـوق المخايـل = وعشبه على دوره غدالـه نواويـر
البـدو دونــه مــادور بـدايـل = تنـزل منازيـل الحيـاً للخواويـر
يوم انهـا توخـذ وتعطـى نحايـل = ومن شانها ترخص عمار المصاطير
واليوم فيها شايـف الوقـت مايـل = حطوا لها بالمرح شبـك بمواسيـر
حتـى الاصـره بدلـت بالشمايـل = ومربطه بالشبك بـرص المواخيـر
راع الولع منهـا يشـوف النكايـل =ماتعجبـه خلفاتـهـا والمعاشـيـر
وجهـة نظـر ياكاسبيـن النفايـل = وترى اختلاف الراى لابد مايصيـر
النـاس حتـى دمهـا بالفصـايـل = ماهو سواء والورد عكس المصادير
اوجزت قولي بل البيـوت القلايل= وعبرت عن ماكن بالصدر تعبيـر