قصيدة في مزاين ابل حــرب

هذه قصيدة لوالدي الشاعر/ صالح بن حمود القويضي العياضي

المناسبة : فخر أعتزاز في قبيلة حرب العظيمة وفي مهرجان الابل المقام في خبة النقع والآن إليكم هذا الشعور الحربي

عساك يانجم تلالا وتعلا =بأسم القبيلة عن سماء نجد ماتغيب
اللي لهم بيض الصحايف سجلا =بحق الخوي والجار كسابة الطيب
واللي قرأ بصفحات " حرب " وتملا=يلقى بهن سلم بعيد عن العيب
كل على ماقيل شيّد وهلا=وساع المضايف بالكرم والتراحيب
يقلط على صفر تلالا وزلا =ومن عقبهن بالمطيبة عجة الطيب
صفر تعاقب والمناسف اتلا=والحيل ترمى مع طرف شمّخ النيب
وزيانهن بالخور كل تحلا =بمزاين الرزفات حرش العراقيب
اللي لهن طول النظر مايملا= وضح وشعل وصفر سود غرابيب
لاروحن مثل النعام المجلا=مع صحصح بالقيظ يقنب به الذيب
ولاقيل قاديهن عن الدرب زلا =يردن مواريد القطا باللواهيب
يازينهن لاروسن بالمفلاّ=وان بركن مثل المزون المهاضيب
تطايحت والشوف عنها اضمحلا=وندب لهن وجن الموده جناديب
يطرب لهن قلب به الهم ولاّ =ويرجع بهن لعصر الصبا راعي الشيب
لاشافهن عقله به النقص حلاّ =يرمي العمايم ويزعج الصوت ويليب
كنه هبيل له حديده يتلا= بساعة يحظر بها الفكر ويغيب
ومدهالهن جعل الحيا له يعلا = بمد رب يسمع الصوت ويجيب
ترزم رعوده والمطر يستهلا =ويجري بها وادي بعيد المجاذيب
ماكفته لاهه لباب المكلا =ومن الساحل الغربي لحد النويصيب
ياواحد من فوق عرشه تعلا =ويامنطق الممهود لامه عن الريب
يامن لعقد عسر بيسر تحلا =ترجع لزاهيات الغلب والدباديب
واعداد صبح عقب ليل تجلا =صلو على اللي رتب الدين ترتيب