القصيدة التالية في قبيلة حرب

قال الشاعر/ فرج بن خربوش الشمري رحمه الله

القصـيـدة التالـيـة فــي قبـيـلـة حـــرب

يا راكبٍ من فوق زين المشاديد=متحــدرٍ من روس عالي جـباله
ممشاه من سلمى عطاها الرواعيد=الاجــنـبي وان جاه يعـطي جماله
من جاه في سلم العرب بالشرف زيد=ومن جـاه في حــربٍ تعــزز لحاله
من راس ابن خربوش ماهيب تقليد=من دار ذربــين الــلغى والجـــزاله
والنضو ركابه علي كيف ما اريد=لابــن معيــتــق زاعــجـيــن الرســــاله
يهلي براع النضو قبل التناشيد=ريـــف الركاب اللي تــوامي حــباله
ويقلط العاني بزين المقاعيد=ويسيـــح عـــند مــنـــفــــد البــــن بـاله
قل وش علم جيشك مر سلمى مسانيد=هل اللحـيـسه مكــرمة من عــنا له
وركٍ بوجه الهجن لا جن مصاعيد=قـــدامــــهن الوافــيــن في كل حــــاله
الضيف يعطونه علي كيف ما يريد=ويــقــعــدونـــــــه بي مـــكان الشــكاله
علي النعي مثل المحوص المواريد=يحيــون باللي فــاض مع راس جاله
حب اللقيمي ميرهم مع نمى الغيد=وفــنجال بن مونـــسه مع كــــماله
بدوٍ تنفد غالي البن تنفيد=بدلال وارفــــافٍ طـــويل ظلاله
ذولا محاديرٍ وذولا مسانيد=يهلــــون بالرجـــــلي وراع الــزماله
شرقي جبل سلمى قرايا المساعيد=ملافــــظ الشـريان تـرهم شــــماله
جيشك تعدانا وياخذ تصاديد=دليــل جـيـــشك فـوته من هــباله
ومثلك يشيم عن كثير الهرابيد=والا نعــــرف الطيـــبه والفــساله
معزبكم المذكور يا عل ما يفيد=يا حـــيــف ليـــتك بارزٍ به لحـاله
على خلاك مسويٍ قد ما تريد=والا سكـــت ودامـــحٍ له خــــماله
كل العرب فيها ختوش ملابيد=شخـوص العـرب ما تــــندمر من حـــثاله
حربٍ من القبلة الى ادنى تخاديد=وياما بحــــربٍ من رجــال الشــــكاله
وياما بحربٍ من كرام صناديد=وياما بــــهم من مــدركـــين الجــــماله
وياما بهم من مشبعين المراديد=شيــــوخٍ تــنــــفـد مالها دون حـاله
معنا صداقتهم سنين سراميد=وراع الثــنا ما ينجــــزى بالفــــساله
ابن نحيت ينفد الملح تنفيد=من كون بقــــعا عــنــدنا له جــــماله
مع شمرٍ ورد على الموت توريد=أرخـــى على حـــوض المـــنايا حـــــباله
ويوم المليدا شدد الحرب تشديد=مرقـــب غــضيٍ نـــشده وش جـــرى له
ربعه بنى سالم مشوا والجمل قيد=يوم ابــو ضيف الله بـــرايٍ عـبا له
وضيف الله شوق اللي نهوده مقاعيد=رخــيـــص ما باليـــد ثـقـــيــلٍ بحاله
ألين من الماهود ما به عواقيد=حــلال قــــالاتٍ تـــلـــولس حــــباله
واخوان حسنا للمجوخ صياييد=بالسيـــف ردوا عــــند تـالي ثـــقـــاله
في درب ابو جلال تلقى المفاريد=تـــشدى دروايشٍ عن الـــدرب عاله
جلال شوق اللي طماحه تصاديد=مربــوعة حـشـــــو المنـــقــش جماله
ورد لجام السيف بالراس توريد=بيوم به الخـــفرات تــرمي شــياله
بني علي ربعه على كيف ما يريد=تــرعى بهم شــقحٍ على الحــمض مــــاله
واخوان نورة تكرم الضيف وتزيد=تـــــورثـــوا بـــاس المـــهادي وباله
يرعن بهم الزرفات فيضٍ وتسنيد=مع حجرفٍ سيفٍ ورايٍ برى له
وناهس صليب الشور عقب صناديد=عـقـب شيـــوخٍ تفـــرح اللي عـــنى له
وغالب ابن مقحم ذرى كل رعديد=زبن الحـصان الــلي تـــوطا حـــثاله
إلي تعلوا طايعات المقاويد=كم من طمـــوحٍ قـــلـدوها حــباله
اللي قنص بالحر صياد وايفيد=والـــلي قــنص بالتـــبع عــزى لحاله
وفيحان يثني دون شقح مواليد=وان ضيــعت عــقــب الضــبابــة عـــياله
وكم سندت خيل المضايين تسنيد=ومن ذل فـــنجـال الشــرف ما مـــشى له
يا مال طوبى ماجدٍ عندهن صيد=وجـحـيـش والعـبـــد المـطرف بـــرى له
كل نخبره بالثنا والتماجيد=ابن صميعـــر فــــرحة الـلى عـــنا له
من دون ضيفه ورد النفس توريد=فـــكـــه من الحـــكام وارخـــص حــلاله
عقيد عيراتٍ تبوج البراريد=دار العــــدو لازم يـــدوج بــــجاله
نزه الشوارب عن جميع العواقيد=الله يحـــل الشايـــب اللي غـــدا له
وخلف ابن ناحل مضيفه تقل عيد=الـلي عـــطى الزمال من حـــر مـــاله
ونافـــل ابن غميض يشريه ويزيد=راعـــي الخــروف يـربــــحه لا عـنى له
والنعم بالناقي الى جا جويريد=تـــلــقى الشبــب بــبـيـوتـهم والشـــكاله
نفوسهم للضيف مابه عواقيد=أهـــل الملــــيحا يوم جــــود عـــقاله
وزيدان ابن مطلق الى جن عراجيد=ذيــب السمـيـن الـلي تعـــرم حــياله
هدات حرٍ طالع في جلا الصيد=صيــده من الجـــزلات ما هي هــــزاله
ليا ما لقى ضانٍ كرم بالمعاويد=مخــيــمر ابن مطـــلق صبي الجــزاله
راع الكرم والجود بالفعل وايزيد=جعــله لجــنات النـــعايم نواله
ورباح ومحمد على كيف ما اريد=والمـــرجلة مسوا مــثاني حـــباله
والماكر الطيب لربعه مقاصيد=ومن جـث من خـــوٍ تبـيـن قــباله
شيوخ حرب الكرام الصناديد=ذبيت عـــنهم يــوم صارت شــكاله
الطيب ان جيته يزودك تزويد=والحـنـــظلي ما يـقــبلونه عــياله

	والنعم ملايين بقبيلة حرب العريقه الله يعطيك العافيه اخوي مشعان الحربي ولا عدمناك علي طيب اختيارك وصح لسان شاعرها شكرا لك

صح السان الشاعر الشمري

وبيض الله وجهه

الله يعطيك العافيه

صح السان الشمري

بيض الله وجهك

ماقصر الشمري

بيض الله وجه على القصيدة

وبيض الله وجهك على النقل

صح لسان الشاعر/ فرج بن خربوش الشمري رحمه الله

وبيض الله وجهك على النقل

اتمنالك التوفيق إن شاء الله

أخيك ابوروان

يعطيك العافية و بارك الله فيك

على هذه الجهود الراااااااائعة

الف شكر على مروركم =
بيض الله وجهكم =
دمتم بود=