((مليون)) رساله إلى غائب

للحزن بوجيـه المساكيـن ساحـات = تنطق لو ان الصمت هيمن على البوح
بسكاتهم تسمع للاوجـاع صرخـات =وبنطقهم تلمـح علامـات وجـروح
يحكون لكن حكيهم ما لـه أصـوات = حتى ولا صوتاً من الحـزن مبحـوح
يبكـون دم وينزفـون ابتسـامـات = لوكان دم الوجه مخفـي ومفضـوح
في نهجهم هات أقبلت وادبرت هـات=وان أملوا ما بالافق عـارض يلـوح
لويقـدرون يترجـمـون المعـانـاة =قاوا . . لو ان القول ماهو بسمـوح
أوراقنـا غصَـت بكثـر الكتـابـات =من كثر شرحاً مالقا صـدر مشـروح
نظلـم ولا نعلـم ونحلـم بوقـفـات =في محكمة شرعاً به العـدل مذبـوح
نحتاج وقفة من وقف خمس الاوقات=لحظة خشوع الروح مع خالق الروح
لو الوفـا بالوجـه يتـرك علامـات = كم وجه شخصاً بالردى كان ملفـوح
شف هاليديـن الطاهـرات العفيفـات = اللي تمد الطيب من غيـر مصلـوح
صارت ملاعـق للبطـون الخبيثـات= اللي تعـج بريحـة المكـر وتقـوح
الله ياليـت الكوالـيـس شـاشـات = ونشوف ما خلف الكواليس بوضـوح
أحدٍ يحـب الـذات ويعيـش لـذّات =واحدٍ عن اللـذات بالـذات مكبـوح
من مات واسمه حيّ مامات لو مـات = ومن مات ذكره مات لو كان به روح
قل للعيـون اللـي يديهـا قصيـرات=درب الأمل له بـاب مـازال مفتـوح

للشاعر ... زياد بن حجاب بن نحيت الحربي ...

قصيدة كاملة احتوت ابداع بلاغي وابداع في الحكمة ...

تمنيت أنها قيلت في غير ذلك البرنامج ...