. . . ( رسالة إلى تيم .. بطل مسلسل سنوات الضياع ) . . . !!

مساءكم سكر :
.
.
أخر ماكتبت .. تمنياتي ان تحقق هدفها .. !!
.
.

يا(تيم ) بلِغ لي الليا شفت ( لميس )= قل ضاعت شعوب الجزيرة وراهـا
حتى النشامـى كاسبيـن النواميـس= قضى على باقي هممهـا .. حلاهـا
ولحق النشامى بالضياع .. المعاريس= كـم واحـد ٍ حبيبـتـه مابغـاهـا
تلعب بفكره ..فارغـات الهواجيـس= والليا سألتـه قـال مـاالله عطاهـا
لو إنها كتلـة مشاعـر وأحاسيـس= ومن لابة ٍ فيها الوصايـف تباهـى
الخوف باكـر مبعديـن المراميـس= شيباننا .. ترجـع وتصـدى لحاهـا
هذا يبـي شـد ٍ وهـذاك تخسيـس= يمكـن يزيـن بعينـهـا لا لقـاهـا
كله سبب مـن تستثيـر النسانيـس= ماكـن بالدنيـا مــلاك ٍ سـواهـا
والناس مهما كـان منهـا مفاليـس= ماهيـب سلعـة بالسهـل مشتراهـا
لكنهـا فتنـه يـروّج لهـا أبليـس= وإعلام فاسـد بالشمـول إحتواهـا
رسم لها صـورة تفـوق المقاييـس= الناهيـات .. ولاوصـل مستواهـا
حتى القصص اللي تسجل بإسم قيس= شف كيف تأثير المسلسـل محاهـا
الوضع مزري والحقايـق كوابيـس= وعقولنـا مـر الضيـاع وخذاهـا
علـى دروب التايهيـن المتاعيـس= يـوم إن ربـك بالدمـار إبتـلاهـا
مؤسسه ..لكن على الـذل تأسيـس= ماعاد يفرق غيظهـا مـن رضاهـا

.
.
منصور المعمري
8/8/2008م