البارحه ليلي قضيته

البارحه ليلي قضيته بين هم وبين ضيق=ليله بها نفسي تزيد وتلتهب في شوقها
لانامت عيوني دقيقه افز من نومي وافيق=ولامن هدت روحي علي الذكريات تسوقها
من هاجس(ن)دك الضمير وشب في صدري حريق=نفسي تقول ان الجمر يجري بوسط عروقها
في غبة بحور الحزن اصبحت انا كني غريق=وعيني تهل دموعها يوم ان تفجر موقها
ياصاحبي يوم الرفيق يجاوب لصيحة رفيق=وعيب(ن)عليه يخون عشرة صاحبه ويبوقها
ماهو بانا اللي يضيع المشوار في نص الطريق=وماهو بانا اللي يقول كلمه ماعرف منطوقها
اشيل همي باالزمن لوانه اكبر من طويق=وكثرت علي هروج ناس(ن)ماتسد حلوقها
تجمعوا من كل صوب وشكلوا ضدي فريق=وقامت علي خيولهم تشعب معاها نوقها
وانا عقب حملت روحي باالزمن مالاتطيق=عاهدت نفسي اني ارد الطاقه لمطبوقها
وصديت لاني رافعن نفسي عن اللي مايليق=ولاجاب لي النمام هرجه قلت عني سوقها
الحمدلله مايعوقني بهاالدنيا عويق=الارض ماطا للقدم والا السما من فوقها