ديوان كسرات بيان الصمت

بيان الصمت=
سلام ياعالـي المقـدار=نبغى من القيـل أفنانـه
معاك يحلا لنا الإبحـار=يوم الهوى حرك أغصانه
ابوفرح=
ترحيب منا عدد مليار=يابادع القيل والحانـه
معاك يحلا لنا المشوار=لاسرت قايد وربانـه
بيان الصمت=
عامين فكري معه محتـار=وغيث الوصل ترعد أمزانه
لكن فحيـن اللقـا جبـار=مايرحم القلب واشجانـه
ابوفرح=
شوقك مطيه وعينك نار=وروحك مع البرق هيمانه
آمال الانسان مهما صار=ماتتبع بـروق خوانـه
بيان الصمت=
ابني اتجاهي على الآثار=والقلب بالقلب ميزانـه
لكن طبعه بعيد اغـوار=والود ما تثبت الوانـه
ابوفرح=
قريب تشكي بعيد الـدار=والدار مليـون سكانـه
لابد في نشرة الاخبـار=تعلن عن اسمه وعنوانه
بيان الصمت=
محال نفشي عنه أسـرار=ما غرّد الطيـر فاوطانـه
ولاشفت جوز الحمام وطار=ثوَّر على القلـب بركانـه
ابوفرح=
انذار مرفق معاه اشعـار=تحذير للي علـى شانـه
مرسول من هيئة الشعار=ثابت على الساس واركانه
حذرا من الثعلب المكـار=يلعب على اوتار خلانـه
بعد المسافه ماهو اعـذار=لاسار عنده لكـم خانـه