قصائد شعراء حرب المشاركين بشاعر المليون

الشاعر ماجد بن هواش السليمي الحربي

آه لامنـا دنـى الليـل مـن دون النهـار=والقلوب مـن الروابـع تفيـض وتمتلـي
والأ مل دونه ضفا الليل والحلـم استـدار=وقمت اصارع ليل عيـا سـواده ينجلـي
وانتي أغلـى درةٍ دونهـا مـوج البحـار=ونجمةٍ مـن دونهـا كـل نجـمٍ معتلـي
لاستطيـع الصبـر دونـك ولاليـه قـرار=بس أصالي نار شـوق بقلبـي تصطلـي
ولا استطيع الحرب ضدك ولا افلح بالحصار=المسلـح قـدم جيشـك سـواة الأعزلـي
كـل ماقلـت أنتهينـا وغيرنـا المسـار=استثار القلب طيفـك وجيـت مـن أولـي
وكـل ماحـددت بالعمـر للفرحـه مـدار=الهوى من باب ما من بعارض هـب لـي
أجبر الخاطـر بطـول الأمـل والانتضـار=وحسب الأيـام ليـه ولـو كانـت علـيّ
ورحت وأنا ويا مساع الأمل لعبـة قمـار=لاستعـز القلـب منهـا ولا منهـا خلـي
بالصباء والرأس بانت به رسـوم الوقـار=والليالـي ممـديـة والعـمـار تكمـلـي
كيف لا والموت لو صـد حبلـه بالعمـار=أقلبـي قبـل الليالـي بغايـب تقبـلـي

الشاعر حمد بن محمد المخلفي الحربي

لاجتك زلة من رفيق توده =رفيقك اللي ماتعدد مزاياه
رفيقك اللي تقصده وقت شده =وتنحل لامن شفت طلة محياه
بينك وبينه خوة مستجده = متجول في قلبك أدناه وأقصاه
حبل الوصل بينك وبينه يمده= يمك يسوقه قلب وتشيله خطاه
نفسه يطمنها ولو فيه حده = لجل الرفيق يكب شي تمناه
مايتركك في سهلة مجرهده =طيب وهذا طيب ساس ومجناه
صقر ينومس بالقنص من يهده =وافي شبور وطيبات نواياه
احذر خطاه لغير نفسك تعده = وأحذر يجي غيره ويجلس بمركاه
ادمح له الزلة وحذرا تضده =ودور على عذر يعذره وتلقاه
لاتشيل نفسك والجبل لاتهده =وأحذر تكون اللي نقل داه برداه
باب الجفا لافك عجل بسده = وابليس لا أبلس بالقطاعه تحداه
أوصل رفيقك عاتبه في موده =وبين له اللي حس بك من خطاياه
وأحذر مجالس راكبين الأشده= أشدة الغيبة رجال المحاباه
أهل النكد وأهل الوجيه المصده= قوم على نقل السوالف مضراه
رجالهم دايم معشي ببده = عزاه ياللي غير الدرب عزاه
ماينفعه طيب مسويه جده= لاصار خايب مايسوي سواياه
والقاف الأول يارفيقي نرده= رفيقك الطيب من الصعب تجفاه
لاجتك زله من رفيق توده =أحذر تنكر له وبالشر تجزاه