ديوان الشاعر// عبدالعزيز بن حمود ابالعون

عنيت ميـر انـي نويـت النكوفـه=من يوم حصلت لى صواديف وصدوف
ياعنوتـي ماهـي علـي مخلـوفـه=من يوم شالوا راس مالي وانا اشوف
بسباب لوعـات الزمـان وكسوفـه=عز الله اني من عنا الوقت مكسـوف
هات القلم واكتـب بيـوتٍ طروفـه=عندي وكلُ لـه تصانيـف وصنـوف
عنهـن عذاريـب الكـلام محذوفـه=ومصفيات كلهـن صـف وصفـوف
بيتيـن مافيهـن علـيـه كلـوفـه=وانـا علـى رد التماثيـل مكلـوف
قلبـي عواصيـف الطـواري تلوفـه=لوف الغصون اللى على جال طفطوف
يلوفهـن شغـفٍ عـلـى طـوفـه=على شفا جرفٍ من السيـل ملهـوف
واطيري اللـي فيـه يامنيـف نوفـه=طير الثلاث اللي على الصيد مزغوف
تزيد عـن وكـره مضـارب كفوفـه=كنه يطالعله مـن ا لجـو خاطـوف
وليا عثـا بالجـول خـرب صفوفـه=مضراب مخلابه على شامة الجـوف
ماهـوب وكـريٍ يهـمـه علـوفـه=لو هو على وكرٍ من القطف منـدوف
ياكل ولا يوكـل كـلا الـدود جوفـه=ماينفعه كنه مـن الريـش منتـوف
واجـد معاذيـره واجــد ظـروفـه=خصٍ ليا جولـه مساييـر وضيـوف
والكبش يانيـاف لـو طـال صوفـه=اصله هو اصله كبش ماينفع الصوف
خطـو البليـد اللـي كبـارٍ دفوفـه=بالفعـل ماينفـع وبالهـرج ملقـوف
يغضي على الهرجه وهـي ماتطوفـه=هميصعـيٍ ياخـذ العلـم منصـوف
هـذاك لـو ولاّ عسـاهـا ذلـوفـه=مهـف دخـان تقـفـاه عـاصـوف
وجدى على شيـخٍ قليلـه وصوفـه=زين الطبوع اللي مع الناس مالـوف
اللـي فعولـه بالجميـل معـروفـه=يشهد له التاريـخ والعلـم منكـوف
مالـه بروحـه دون ربعـه مروفـه=هذاك بن ناحـل ومعنـاي مكشـوف
مهـو ريـا طيبـه ولا فيـه شوفـه=حجر على واجد من الناس به نـوف
نفسه على حـال الضعيـف عطوفـه=وان زاره المظلوم يامن من الخـوف
كم من سجين طلعـه مـن صدوفـه=لو دونه الحراس والبـاب مـزروف
تم الكلام اللـي علـى الفـا حروفـه=بيتين معناهن على الألـف ملفـوف
وصلوا على اللي نستعيـن بوقوفـه=يوم الحشر والناس طوفٍ ورى طوفه