قصيدة ، فكاهية

السلام عليكم ورحمة الله وبركاته

دعيت هاجوسي وفي خافقـي نط
بفكرة عمل تحتاج خطة وتخطيط

بقط سوق الكذب والهلس والخرط
ضاع التعب مابين خرط وخرابيط

أفتــح مجـمــع للمـواتـــر مفـقــط
وأخفـض الأسعـار كـاشٍ وتقسيط

و محـل زينـه مع منجـد بها آحـط
إستيكـر و ظـل وستايـر وتجنيط

وبنشر ورشة عندها مخرطة خرط
وجميـع مايحتـاج فـك(ن)وتربيـط

ولا تشيل هم إن كان موترك خبـط
حنا نجي لك لا حصـل فيه تخبيـط

بسطحات نقلٍ للمعطل على الخـط
بأسعـار معقـولة ومـن دون تفريـط

و ميـدان بمـدرج للشـباب المفحـط
من بعد ماأستصدرتصاريح تفحيط

وهندي للإستقبال لامن ضحك مط
لجلب الزباين مطط الشدق تمطيط

وأمَسِّـك الصنـدوق للذيـب الأمعـط
عيونـه تلاقــط و إيدينـه ملاقيــط

ولا بـد مـن تشليـح خلـف المخطـط
مهـو النوااعـم في السواقة مخابيط

مشــروع يقطـع خـط كـل الجحلـط
واللي عرض خدمة_ بمكرٍ _لتوريط

البيرق

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

	المشاركة الأصلية كتبت بواسطة الحب الباقي

	صح لسانك مليون على القصيده والله يـعـطـيـك الـعـافيـــــــــــة بيض الله وجهك

صح بدنك
الله يعافيك
ووجهك أبيض

صح الله لسانك
ولاهنت
وسلم فكرك وبنانك
دمت برعاية الله وحفظة

😭😭😭😭
صح السانك
رغم الطرافة الا ان فيها افكار استثماريه ناجحة
( ماهو النواعم فالسواقه مخابيط )
اتحفظ على هذا الشطر

	المشاركة الأصلية كتبت بواسطة فهد ابن غانم

	صح الله لسانك ولاهنت وسلم فكرك وبنانك دمت برعاية الله وحفظة

صح بدنك
ولاهنت

	المشاركة الأصلية كتبت بواسطة حسيـن

	😭😭😭😭 صح السانك رغم الطرافة الا ان فيها افكار استثماريه ناجحة ( ماهو النواعم فالسواقه مخابيط ) اتحفظ على هذا الشطر

صح بدنك
البيت أعني به
في بداية تعلم السواقة