(كُلُّ نَفْسٍ ذَآئِقَةُ الْمَوْت )

(الَّذِينَ تَتَوَفَّاهُمُ الْمَلَائِكَةُ طَيِّبِينَ يَقُولُونَ سَلَامٌ عَلَيْكُمُ ادْخُلُوا الْجَنَّةَ بِمَا كُنْتُمْ تَعْمَلُونَ ).صدق الله العظيم

/
/
/
/
/
/
/
/
/

اتغيب عن بالي تراها استحاله=لوغاب زولك ماانت غايب عن البال
بيني وبينك ودّ واضح كماله=مبناه جيّد مادخل فيه عذّال
يابوي ودّك في فؤادي جباله=انام واصحى خاطري عنك مامال
بعدك عذاب ولاقويت احتماله=وموتتك منها ضايق البال والحال
حالي بموتك مالها وصف حاله=الا كما الجوّال مقطوع الارسال
الحزن في ذكراك يلقى مجاله=وان زرت قبرك صادق الدّمع سيّال
وعقلي بعد فرقاك شاف انذهاله=مااستوعب الموقف ولازال بإذهال
وقلبي مع الاحزان يفشل نضاله=وشلون يقدر وانت نسيانك امحال
احنّ لك حنّ الغريب لعياله=لاصار صعب امواصله والشّقى طال
ولاّ كما تايه بصحرى لحاله=يشتاق شرب الما على ذروة اللال
ياعبيد ابن معتوق صيتك جماله=مضرب مثل بالطّيب ياراع الامثال
ميراثنا منّك علوم الرّجاله=اللي بها لاقي غناتي عن المال
ياعزّ من ينضام لامن شكاله=توفي بوعدك ماذكر عنك بطّال
وتفصل بفصل الحقّ لاجات قاله=واتبتّ فالموضوع في حلّ الاشكال
عقلك رزين ولاتجيب الجهاله=واتشوم عن مجلس حضر فيه جهّال
ويلقى الشّرف والعزّ من كنت خاله=ويسمع من اهل الطّيب والنّعم فالخال
ويمناه فيها بيرق العزّ شاله=من كنت عمّه شاف تقدير واجلال
ومن قال ذا جدّي هني في مناله=يعتزّ باسمك ياخذ المجد له فال
محبّتك فالنّاس تعطي دلاله=على صفى قلبك وذا حقّ ينقال
روحك جميله ماانت راعي حياله=وتعزم وتكرم وانته ابسمح الاقبال
مشّيتني درب الوفا والشّكاله=راعي وقار ولنت للهرج نقال
عزيز ماتجلس على النّاس عاله=ولافيك ميل ولنت لسّحت بكّال
من جالسك ماملّ من طيب فاله=يلقى علوم العزّ مع كيف فنجال
ليّن جناب ومرح فيك الاصاله=وحبّوك جيرانك رجاجيل واطفال
حبل الوصل مااذكرك قاطع وصاله=تذكر يابو يوسف على زين الافعال
وهرجتك موزونه وكلّك عداله=وقولك مثمّن واشهدوا فيه عقّال
رجّال ماتحسد ولابك نذاله=ماشفت مثلك فالرّجاجيل رجّال
كتبت مايوصف شعوري مقاله=فالغالي اللي مايخيّب للامال
ومرثيتي فابيات جات ابعجاله=واوجزت فالتّعبير في شيخ الابطال
وقولي فابوي الحقّ بالحقّ جاله=اللي له اخفض له جناحي من اذلال
مروحوم بامر اللي نعظّم جلاله=الواحد اللي يرسل الرّيح بخيال
يسكنك دارٍ ماتفضّل بداله=في جنّة الفردوس ياعبيد نزّال
مع النّبي واهل الشّهاده وآله=عِنْدَ مَلِيكٍ مقتدر فرد متعال
وياالله ياللي نجتهد في سؤاله=يالواحد اللي ماخفت عنك الاعمال
عبدك دخلّ ذمتك وابنه دعاله=شفّع به امحمد في يومٍ به اهول
وجازيه بالاحسان زيّن مئاله=ويدخل حماك ان صاب فالارض زلزال
وصلّي على اللي مؤتمن بالرّساله=اعداد ماينزل من المزن همّال

الشّاعر/ خالد بن عبيد بن معتوق ألأحمدي

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

الله يغفر لوالدكم ويسكنه فسيح جناته

الحُب الباقي
الله يحفظك ويطوّل بعمرك
اشكرك على مرورك

صح الله لسانك
ولاهنت
وسلم فكرك وبنانك
دمت برعاية الله وحفظة