الزمن ,, رسالة الى منصور

شب الجمر ياجرح واسقيني جروح = ودرّج بنفجالك لمنصور واسقيه
اقرب نسولف همنا متن وشروح = ونذل زوله بالصبر ثم نكويه
واشرب بنا من مر الايام قرطوح = ثمّن نونّه حرف ثمّن نغنيه
شعر الفتى الحربي من الراس مقدوح = صافي ولاغثربه فعل الزمن فيه
يقول خالد مني القلب مقروح = وجفني جزا عن مرقده من هقاويه
همٍ فوسط الصدر باني له صروح = وليا هدمته جدّت علوم تبنيه
ماهو سبب غروٍ مغندج ومملوح = ولاسبب مالٍ من العالم ارجيه
يالعنبو وقتٍ به الظفر مطروح = واللاش يمرح والهملّق تباريه
صار العثو يفتل شواربه ويشوح = والقوقصة تحوى الصقر ثم ترديه
يوم المقارع كان مقعي ومبطوح = واليوم رز الراس والقمل ماليه
وولد الاصل منفي ولا منه مصلوح = وياعنك من لا يعرف الصقر يشويه
قومٍ لنا الطالات والغير مرجوح = سقم الحريب اللي تحير مداويه
وقت العزاوي تهجد جبال وسفوح = ونشرب في فنجال العدا ثم نرميه
ابصّم شفاهي على سم ذرنوح = والناس ماتدري عن اخوك وشفيه
لامارخص دمعي ولاهل مسفوح = مادن راسي لو هو الوقت حاديه
منصور دور الكيف واسقيني تروح = ودوك العنا خذ منه ياخوك واعطيه

خــالد الحــربي (بن نامي)