أثرك رابض على بر القصيم و فطح الحيل(صياف)

أنا أبلشوني عتيبه في عفيف و وادي السيل= و أن راح مطلق طلع لي فالبلد ملفي و لافي
لكن حنا نعرف الحق و نحط المعاديل= كلاً يبا ياخذ اللي يعرفه بيِن و خافي
اللي سواتك يجيله من عباد الله مداخيل= و الارض قدام عينك وساعه و الجو صافي
وشلون حالك بعد ماغاب نور الجدي و سهيل= عساك ياصاحبي صياف طيب و متعافي
أن كان تقدر تسافر فالنهار و تسري الليل= خلك على جنبي الأيمن لاتمشي من خلافي
أنا معافا و طيب و أعرف علوم الرياجيل= و إليا اقبل البرد أطب السوق و أجيب اللحافي
رجلي على رجل خيالٍ سواتك يتعب الخيل= اللي يواسيلي المده يجيه المد وافي
الخير ياصاحبي مقبل فالايام المقابيل= مايفلس إلا ضعيفٍ يطلع الريعان حافي
أنا أعرف انك تكيل أمع الرجيال و توفي الكيل=لكن وشلون كيلك عند عمار النصافي
العام فوحت لك دله و قرقعت الفناجيل= و اليوم تشعلي النار و تصيِح للمطافي
لاتحسبني خلاوي لاسبوح و لامراسيل= أضحك لذاك و هذاك و لابس(ن) لي بشت ضافي
أنا أشعل النار و أركب فوقها صفر المعاميل= و البن و الهيل ياصياف في جوف المصافي
أثرك رابض على بر القصيم و فطح الحيل = و المورقه ياكلون الريش فالسبع العجافي
بغيت تطلع غني لكن ضيعت المحاصيل= و الظاهر أنك تذب الريع و سنونك نضافي
لو عندهم بحر مثلك فارقوا دنيا الغرابيل= صادوا من الحوت لو أن البحر ماهو بدافي
اشره على اللي ترك سلم الرجال و بارد الحيل= ماهو بتشره على اهل الطيب و الدنيا عوافي