ديوان الشاعر/بدر بن عواد الحويفي الحربي

يـامـبــارك الـصــقــار قـــــرب هـبــابــه=والـطـيـر قـرنــس واكـمــل الـريــش تكـمـيـل
والـوســم لـــه يـومـيـن داخــــل حـسـابــه=الله لايــحــرم وطــنـــا مـــــن الـســيــل
يالله بــنـــو يـــــوم يـــــردم ربـــابـــه=تـوابـعــه مــثـــل الـجــبــال الـمـظـالـيـل
يـومــر عـلــى غـســل الـمـحـول انـصـبـابـه=فـــي قـــدرة الـخـالــق يـكـيـلـه مـكـايـيـل
يحـيـي الهشـيـم الـلــي يـبــس فـــي تـرابــه=يـبـسـت عـروقــه والـهــوا شـالـتـه شــيــل
يـبــس الـشـجـر والـقــاع والـعـجـز صــابــه=وضـاقــت عــلــى راع الــحــلال الـمـهـازيـل
راع الـمـواشــي زادهــــا مــــن زهــابـــه=يـرهـن لـهـا الـذمـة ويـشــري لـهــا الـكـيـل
نـشــف الـثــرى والـبــر مـقـحــط جـنـابــه=والـــلـــي حـــوالـــه دون ذاق الـبـهـالـيــل
يالله بـــدعـــوة مــســلــم مـسـتـجــابــه=مـــن عـابــد لـــه نـافـلـة تـالــي الـلـيــل
يـطـلـب بــهــا ربــــه ويــرجــي ثــوابــه=وقـلـبـه نـظـيـف مـــن الــريــا والتـضـالـيـل
رزقــــه حــــلال ومـلـبـســه واكـتـسـابــه=مـــا لـلـربـا بـحـســاب رزقــــه مـداخـيــل
دعـــواه عـــن عــجــم الـبـهـايـم نـيـابــه=الـلـي شـكــت مـــن قـوتـهـا فـتــرة الـحـيـل
يـفــتــح لــهـــا رب الـســمــوات بـــــابه=دون الـسـمــا مــــا يعـتـرضـهـا عـراقــيــل
نـطـلـب مـطــر رحــمــة ثـقـيــل سـحـابــه=فـــي الـبــروق تــلــوح مــثــل الـقـنـاديـل
يـاخــذ ثـمــان ايــــام حـسـبــة اوجــابــه=دقـــــاق رفـــــاق زلــوفـــه هـمـالـيــل
والـيــا انـتـهـى الـثـامـن وعــــزل ضـبـابــه=نــهــار تــاســع بــــاذره كــنــه الـنـيــل
والـعـصـر لامـــن الـمـولـع مــشــى بــــه=يـغـيــب هـوجـاســه ويـنـســى الــولاويـــل
لا صـــاغ لـــه فـنـجــال عــــذب شــرابــه=وزنـــه غـديــر وشـــب نــــار المـعـامـيـل
وجـــذب لـهــن جــمــر كـثـيــف الـتـهـابـه=والـكـيــف طــــاب وسـاقـهــا بالـفـنـاجـيـل
عــلــى نـشــامــا مـاخـلـطـهـم قــلابـــة=خـفــاف الـنـفـوس رجـــال مـاهــم دعـابـيــل
ودارت سـوالــيــف مــــــزوح وعــجــابــه=وطــرايــف تـشـفــق عـلـيـهـا الـرجـاجـيــل
هـــذا مــنــى كــــل شــخــص وادابــــه=وكـــل عـلــى شـبـحـه يــصــوغ التـمـاثـيـل
الا الــذي طـــرد الـولــع مـــا شـقــى بـــه=ولا يـعـجـبـه شــــوف الــزهــر بالـهـذالـيـل
مـرتـاح لــو طـــاح الـمـطـر مـــا درى بـــه=لــو تنـشـده مـــا يـعــرف الـجــدي وسـهـيـل