ديوان الشاعر/محمد العسيلي رحمه الله

الناس ناموا وانـا العبـرات اجاذبهـا=جذب الدلي من معينٍ وردها إحيامـي
بيديـن بــدواً مشافـيـحً تناهبـهـا=في نقضت الجزو والماء ورده إزحامي
اشـوف وانكـر مـن الدنيـا ذاهبهـا=تضرب بنا امواجها في بحرها الطامي
ياكثـر روعاتهـا وقـسـوة تقلبـهـا=وماطاب فيها مـن الاحـوال مادامـي
اللي من اول اركوبـه فـوق غاربهـا=ماحصل اردوفها والمشـي درهامـي
تستدرج اهل الامانـي فـي مكاسبهـا=لكن هيهات تصـدق فيهـا الاحلامـي
ومن صدق الريـح واعيونـه يكذبهـا=كنه يقـارن غبـاه بفرصـة الرامـي
تمـر الأيــام ماكـنـي مجربـهـا=من تضحكه يوم يبكي باقـي العامـي
يالله يالله تكـفـيـنـا نـشـايـبـهـا=ياواحداً عن قضايـا الخلـق مانامـي
ياعالمـاً غيـب نفـسـي لا تعذبـهـا=وتجعل لها حجةً من نـور الاسلامـي
نفسً ماباقي لهـا إلا شـوف طالبهـا=والموعـد المنتظـر تدنيـه الايامـي
لنـا مواعـيـد مانـقـدر إنجنبـهـا=توقيتها محكـمً فـي وقتـه إحكامـي
ترمى المنايـا ولا تخطـي مضاربهـا=ومن صوبنه اسهوم المـوت ماقامـي
ساعـة حيـاة إليـا وقفـت عقاربهـا=الروح تصعد ويبقى جرحـي الدامـي
والموت ماتصلـح ارواحـاً يخربهـا=ابا اترك الزوج والاطفـال الأيتامـي
يالوعـة النفـس مـن فرقـا حبايبهـا=ومن طول فرقاً تعثّر فيهـا الاقدامـي
لابـد مـن رحلـةً مايعـود غايبـهـا=وعن الحقايق توارى كـل الأوهامـي
معـي الوثايـق مختـمـةً قوالبـهـا=واخاف مـن نقطـة التفتيـش قدامـي
في مفترق طـرق ياكافـي مصايبهـا=احد الطريقين واحـد منهـن الزامـي
اما مع أهـل اليميـن وعـز جانبهـا=ولا مع أهل الشمال وشرهـا الحامـي
رحمـاك رحمـاك يامـذرى هبايبهـا=ياوامر المسلمين بوصـل الارحامـي
دعـوة طريـح الخطايـا لاتخيبـهـا=انا ضعيف الوسايل والهـدف سامـي
اليا وردت النفـس ناضبـةً مشاربهـا=يالله من شربةً تقطـع ظمـا الظامـي
واجيرنا مـن الجحيـم وحـر لاهبهـا=وانت الذي من لجا بحماك مايضامـي