يمشي بي الواجب على الوجه قدام

هذي قصيدة قديمة أيام الغزو الأمريكي على العراق حيث كلفني العمل في

مهمة إلى الحدود الشمالية وقلت هذه القصيدة :

يمشي بي الواجب على الوجه قداّم = حتى ظلام الليل جاله سهومي
من فوق مرعوشٍ ننوشه بالاقدام = جسرٍ على طي الفيافي عزومي
اليالمسته عن مدا هقوتي زام = قام يتخطّف نابيات الحزومي
كنه اليا حوّل مع النازية ســـــام = بخط الدفاع موجّهٍ للهجومي
احكم تمثاله على نبير الا رقام = اعد فوقه ساريات النجومي
يوم ان كلن في حضن صاحبه نام = وطاب الكرى مع زاهيات الهدومي
نومي على صمدٍ مثل قطعت الخام = أغط وصحي من غياهيب نومي
يما جهمنا بوّل الصبح مجهام = ويما سرينا ليل غدرا قحومي
ويما شوتنا الشمس بالشارع صيام = بوجيهنا ننطح لهيب السمومي
ويما دعانا أمر على غير ما يرام = بالصبر عدّى والذليل امخدومي
من دون ستر وجيهنا نقدم إقدام = ندحر شياطين الكسل بالعزومي
تسوقنا سود الليالي ولايام = حتى نذير الموت جاله رسومي
العمر يطوى كل عامٍ بعد عام = يطويه مجهول النظام اللهومي
والله خلق خلقٍ على كل الاقسام = معطى ومحدود العطى ومحرومي
كم من وضيعٍ حطّه المال مقدام = لولى فلوسه ما سوى فص ثومي
وكم من خبيثٍ يلمز الناس نمام = دايم لسانه بالأجاويد يومي
وكم من رديٍّ ناقص العقل لواّم = كلن حصلّه من بلاويه لومي
وكم من ضعيفٍ قدرته عض الإبهام = لا جاب علم ولا تحذاّ علومي
وكم عاش بالدنيا غريقٍ بالاوهام = مغرور في نفسه سجين الوهومي
وكم نوّ صيفٍ في هقاويك ما دام = معهم عليهم عشرته ما تدومي
وكم عاشقٍ صابه على خله هيام = من حب ترفات الصبايا امهيومي
وكم طيّبٍ ينقلك للطيب همام = شهمٍ لصعبات المراجل يهومي
عزٍّ لربعه كلّهم عنده حشام = ومن حشّم الاجواد صار امحشومي
وكم خيّرٍ من راتب الفقر منظام = ودّه يقوم ولا حصلّه يقومي
وكم من فقيرٍ طاح حضه ولا قام = صار الفريسة للعفون الرخومي
وكم من شباب شب في دين الاسلام = الله هداه لطيّبات السلومي
جليسه القرآن تفسير وحكام = نعم الجليس اللي يبيد الهمومي
وكم كاتبٍ بيّد صواريخ الاقلام = عليه من فن الكتابة وسومي
وكم شاعرٍ وثّق حروفه بالاختام = درٍّ من الجوهر عليه الختومي
وكم شاعرٍ بالواسطة وصل الاعلام = خلى بياض الشعر كله وشومي
وكم من شجيعٍ للمناعير لطام = تاسم مخاليبه رفيع الخشومي
ولا دام عرش العز للشيخ صدام = طشه زمانه من رفيع الرجومي
أصبح ذليل يهددونه بالاعدام = ما كنه الليث الشجاع الجزومي
في مامضى شيخٍ على كل الاقوام = وليوم صاروا حتى الاصحاب قومي
يا الله يا للي للمخاليق قسام = تجعل نصيبي من خيار القسومي
يا معطي أبنادم فضيلات الانعام = أنا دخيلك يالكريم الرحومي
لا خير في عيشٍ بلا عز وكرام = يوم المعزّة ينشري بلف يومي
الله من قلبٍ على هاجسه عام = بين المغاليق العرايا يعومي
عن كل مغرورٍ رفع خشته شام = يحق له عن كل ناقص يشومي
شم الهوا بأرضٍ بها شيح وثمام = غضٍ ورقها بالزماليق يومي
وهضبة ربيعٍ فوقها الصيرمي حام = مفرود كحليّ الجناح الردومي
وعشبٍ سحابه بالسماء يرزم ارزام = على رفاع الارض مثل الغيومي
يجلا هواجيسٍ على قلبي احيام = رواسيٍ بقصى الظماير أجثومي
الله على ربعٍ لهم بالشهر زام = اقطع بهم قفرٍ بعيد اليمومي
ومالٍ يصخّر لي صعيبات الاحلام = يطلق سراحي لا سجنّي لزومي
وجيبٍ جديد الصنع من مصنعه تام = عجلٍ مسيره للوعيرة غشومي
ماني بمن يبني له الظل بلحام = يدور حوله بالقراش مخزومي
إن ما سهجته بين كثبان وآكام = يحرم عليّه خوتي للقرومي
اتبع هوا نفسٍ بها قيد والجام = تطلب محالٍ في وطنها معدومي
شب الشباب وشاب وهجارها غلام = مبهم حديده بالرصاص مختومي
صُم الحلق صنع الفرنجي ولا اروام = اسقوه عقب النار من دم رومي

صح السانك وبيض الله وجهك

صح الله لسانك يا القرم
والله يـعـطـيـك الـعـافيـــــــــــة
بيض الله وجهك

لله درك




رائعه بروعة حضورك المميز دايم ٍ

صح لسااانك


ودي وتقديري لشخصك الكريم

صح لسانك
والله يرحم صدام قاهر المجوس
خذلوه حكام العرب حتى خذلهم الله
هاهم يتساقطون الواحد تلو الاخر

الله الله الله
هكذا الابداع يابن العم
صح لسانك ملايين في ملايين ولايسدون
والله لو اكتب عنك لن اوفيك حقك فلله درك
تقبل تحياتي وتقديري

الأخ نديم المجرة
الأخ رابح الجحدلي
الأخ عبيدالله الحربي
الأخ الحيادي
اخواني الكرام اشكركم جزيل الشكر على حضوركم
المشرف في متصفحي الله لايهينكم
لكم اطيب التحايا :

	المشاركة الأصلية كتبت بواسطة سعد رجاء الحصني

	الله الله الله هكذا الابداع يابن العم صح لسانك ملايين في ملايين ولايسدون والله لو اكتب عنك لن اوفيك حقك فلله درك تقبل تحياتي وتقديري

الأخ العزيز والشاعر الموقر سعد رجاء الحصني
صح بدنك ولاعليك زود يابن العم الله لايهينك
شاكر ومقدر حضورك المشرف في متصفحي
لك تقديري واحترامي

صح الله لسانك
ولاهنت
وسلم فكرك وبنانك
دمت برعاية الله وحفظة

	المشاركة الأصلية كتبت بواسطة فهد ابن غانم

	صح الله لسانك ولاهنت وسلم فكرك وبنانك دمت برعاية الله وحفظة

فهد ابن غانم
صح بدنك وسلم غاليك الله لايهينك
شاكر ومقدر حضورك في متصفحي
لك وافر التقدير