حكم القدر

السلام عليكم ورحمة الله وبركاته

/

اخواني واخواتي اعضا واعضا ادارة ملتقى حرب الرسمي الغالين على قلبي
اعتذر عن غيابي وهذا نص من جديدي عساه يشفعلي عن الغياب ويروق لكم
وهو موجه للشاعر القدير / فهد ابن سعيد الحربي ابو زياد
وهو من ابناء عمي ومن اصدقائ المقربين

/

/
واقول فيه

يابو زياد ان كان تبغا علومي = البارحه غاب القمر و النجومي

كبد السما صارت بليا مصابيح = و الجو لا مغبّر ولا بّه غيومي

اللي جرى فالكون ماهو طبيعي = مدري وش اللي صار يابن القرومي

من بعد ما كانت نجومٍ مطله = و كان القمر له طلتٍ كل يومي

صار الفضا يشكي عزوف الكواكب = ولاعاد به قلبٍ عطوفٍ رحومي

اليل موحش و المسافه بعيده = بيني و بين الزين سهل و رجومي

اطوي مسافه ثم تبدى مسافه = و انا جمل ماهي قليله عزومي

اصبر على مافيّ و اقول باكر = تنزاح عن قلبي جبال الهمومي

لاكنها بعدت و راحت مسافات = حكم الجفا و الصد شبه محسومي

بُعد المسافه غيبت نور خلي = و طول العمر أعيش منه محرومي

وجداه يا قلبٍ في صدر المسافر = حظه تردا ما نظنّه يقومي

جوف الحنايا العوج تكويه الاشواق = و من كثر نار الشوق جنبي محمومي

و كم ليلةٍ و العين ما ذاقت النوم = طول السهر ناشر في جسمي سمومي

سمً ذحاحٍ مثل سم الافاعي = و اتبان في وجه القريص الرسومي

إتشوف لدموعه على الخد خطين = لو أنّه يكابر و طبعه كتومي

سود اليالي بيحت كل مكنون = و يا صعّبها تفسير مشهد حلومي

إمحطم احلامي في ساحة عناده = و كنه خفوقي بالجروح محزومي

و يابو زياد الارض ضاقت عليه = و ياليت لي جنحان و اقدر احومي

اطير عنها دامها ما سعتني = و اغني القيفان يا ليحى يومي

دام الفلك دوار فيامه ادور = يومن براد و يوم حرٍ سمومي

ايامنا ما سميت بالدواليب = الآ عشان إنها محالٍ تدومي

اللي انكتب فاللوح ما عنه مجناب = اقدارنا بتصيبنا كالسهومي

و انا ترا مؤمنًّ بخيره و شره = ما إلطم على خدي و اشق الهدومي

ابقا عزيز النفس ماهين نفسي = هذا ترا طبعي و هذا سلومي

اما يتعنالي مثل ما تعنيت = ولآ على الصدات قلبي جزومي

و ليت الردي يفنا و تفنا عظامه = و ليت الوفيّ يفداه كل الرخومي

اللي اللسنتهم للمقفي سكاكين = و احلوقهم مستهرشه للحومي

و يابو زياد انت للاسرار صندوق = ولو لاك غالي ما عطيتك علومي

/

ووسلامتكم

صح السانك يابو ماجد جزل كما عودنا

وبعد هذا القصيده معذور لاكن يتكررر الغياب

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

صح لسانك

كلماتك غايه في الروعه

أحييك على هذا البوح المتميز

دمت ودام شعرك وبوحك

صح السانك وبيض الله وجهك
قصيدة جزلة من راس جزل

صح لسانك اخوي فايز ومن طول الغيبات جاب الغنايم
كلام جميل
الله يعطيك العافيه
/
\

صح السانك وسلم بيانك

لاهنت
ولاهان
منطوقك

هلا والله يابوماجد
صح لسانك والله يبيض وجهك يابعدي
قصيده قمه من شاعر قمه
وتعودنا منك الابداع والجزاله
وغيابك له تاثير ماهواي غياب
ولكن جيتنا باللي يشفع ...شخصك....و....قصيدتك

صح السانك قصيده شامخه

تقبل تحياتي

صح السانك وبيض الله وجهك
على القصيدة