ديوان الشاعر علي عبيد الحصني

ياقصيدي ثبت القلب من بين الضلوع=قام يصفق مثل دلواً تصافق كل جال
ما أحسن الدله ليا قدمت معها قدوع=وما أحسن القصه ليا جابها سين السوال
يامنشد عن علوم المعارف والربوع=كلهم في خير والوصل عبر الاتصال
لاتسجلها قطاعه ترى ماني قطوع=شفت وقتن فيه قول الحقيقه مايقال
والسبايب كلها من قليلين السنوع=من تمايل عن طريقه يقول الوقت مال
واخسارة واحداً لبس الخبل الدروع=والخبل ماهو بمكسب ولاهو راس مال
اقمحي ياللي بجنبه تهلين الدموع=مثل منهو يرجي السيل من روس السيال
لاتخايل سحاب ولاترسل فزوع=مانت داري لو بدارك عليك السيل سال
انت ماقصرت ترمي على ركبه وكوع=مار عينك ماتشوف الطويل من الجبال
الرجال افكارها تكشف الشخص الخدوع=لا تصوم لك عرب وأنت ماشفت الهلال
قالها اللي لامشى مايفكر بالرجوع=وأن ورد مايارد الا على العد الزلال
شام عن عدن عليه الهمل من كل نوع=وقفتن بالشمس في عز أخير من الظلال
والمسى بالفيضه اللي تساقيهاالرجوع=خير من كل المنازع ومن ومن كل الجدال
اتمشى وادرق الصيد من سد القشوع=واذكر الماضي واسج القدم من فوق السهال
أحسن الحزات عندي مسى يوم الربوع=خص لاشاهدت في يمة القبله خيال
استرح يالجيب لينه يجي تال السبوع=مالك الامن يعرضك نسناس الشمال
لو يطولن المسافات نقطعهاقطوع=سايقك يمشي طريقه وهومرتاح بال
ماتضايق خاطره بالنزول وبالطلوع=مع عزاز الارض ولاعلى الطعس الهيال
يوم يرفع مقدمه كنه الحرالبتوع=يرفع الجنحان لاشاف جول الصيد جال
ياخوي اهل المظامي بعيدين الرموع=اشهد انك فايزأ بالشجاعه والجمال
يشتريك اللي يزيد احترامه بالفروع=مايحصل قيمتك واحدآ مستور حال