باقة ورود

السلام عليكم ورحمة الله بوركاته .
نظرا لقلة مشاركاتي ولضيق وقتي اردت ان آتيكم بباقه من الورود .
تشبعت شعرا حتى مللته ولكي لا افقد لياقتي الشعريه احببت المشاركة بباقه مقتطفه من عدة بساتيني وردا اتمنى لها القبول ان كانت على قدر من النضج .

باقة (1)

قل للوزير اللي له اعـوام لا زال=وزيـر للخدمـه ولا فيـه تغييـر
الشعب ضيقه ضيق وهمومه ثقال=والوضع فوضى والبطاله طوابيـر
ماتت بداخلنا طموحـات وآمـال=واحلامنا صارت مع الوقت اساطير
وآهاتنا تعزف من الضيـم مـوّال=ودموعنا قصه كتبهـا شكسبيـر
ورصيدنا خمسة هـلالات وريـال=وديوننـا تحكـم علينـا بتعزيـر
وزواجنا ما عاد يطري على البال=وأم العروسه ما تحـب المعاذيـر
هذا زمان الغدر والقيـل والقـال=ماهو زمن عنتر ولا سالم الزيـر
الأجنبي يحظى بتقديـر وإجـلال=وإبن الوطن في موطنه مالقى خير

باقة (2)

اللي فقد له غالي ٍ من غواليه =يصبر على فقده وطول انتظاره
ولو ان ما صابه يبيح خوافيه=ماهيب لا كيفه ولا من قراره
والدمعه اللي تنحدر من طواريه=ماهي كثيره فيه ولاهي خساره
والعشق بلوى والعواشيق تتليه=ينزع من الرجل الوقور الوقاره
والمترف اللي زايد ٍ في تغليه=يحطب ضلوع الصدر ويشب ناره
ياليت يعطيني مثل مااني اعطيه=وابني ويبني لي بقلبه عماره
واكتب عباره فيه لو كان ترضيه=كلمة احبك بإختصار العباره
من راح من كيفه عسى الله يهنيه=والحب ماهو غصب ولا جباره
عشق ٍ يجيب الذل مالي غرض فيه=من ياكل الحنظل يذوق المراره
واللي لعب بالحب لعبه تسليه=ينهار بكره مثل برج التجاره
واللي يصون الحب لازم نحييه=ونكرر التقدير تاره وتاره
وكل ٍ له بدنياه عشق ٍ يغذيه=مبني على ساس الشرف والطهاره
وان كان صادف به عتاب ومشاريه=واجب على المخطي يجيب اعتذاره
والوافي اللي يحترم قلب مغليه=يحرص عليه ولا يزيد انهياره
مره تعلى بك ومره تعلّيه=وحضارة التفكير هي الحضاره
وان دام حب الشخص واللي مخاويه=دليل في صدقه وحسن اختياره
واللي يحب وما حصل حب يرجيه=يبعد لو ان البعد فيه احتضاره

باقة رقم (3)

للحب من بين المحبين ميثاق=يشدني نوبه ونوبه يشدك
تشتاق لي مره وانا دايم اشتاق=وازريت اميّز بين مزحك وجدك
لذة غرام العشق في ضم وعناق=احس بإحساسك ويدّي بيدّك
ونخاطب الوجدان من وسط الاعماق=واشرب قراحك وأتمتع بشهدك
واترجم الاحساس وازيد الاشواق=في بوسة ٍ ما بين خدك وخدك
واعطيه من قول الغزل كل ما ضاق=واقول يا الغالي من اليوم قدك ؟
و اقول فيك من الغزل كل ما لاق=واشوف لولوك وجمرك وبردك
لكن لقيت انك من الناس بواق=رايح مع اللي يطلب اليوم ودك
قد قلت لك مشتاق مشتاق مشتاق=لكن صدمتيني بقولك وردك
قلتي ترى جفني من النوم ما ذاق=وان الضروف اليوم بالحيل ضدك
وانا عرفتك ناويه بُعد وفراق=لكنّ دمعي مانزل يوم بعدك