ديوان الشاعر// عبدالعزيز بن حمود ابالعون

يامنيف قلببي كل ماهود الليل = تفتح عليه فجوج يقعا نفقها
مليت من موجست يامنيف بالحيل = وصبرت لين الهم حالي سرقها
صبر المعيد اللي تسج المحاحيل = علق عليها رشاه صفقٍ صفقها
علق عليها رشاه صفق الرجاجيل = خلا شحمها ينتثر مع عرقها
ياراكب اللي ليا مشى كنه السيل = جمسٍ يوسع مهجتي عن ضيقها
نبي نزور اللي عليهم مغاليل = ذيك الوجيه اللي ينومس رفقها
دار الرجال الطيبين المشاكيل = وننحاش عن دارٍ تهاوش سلقها
ننحاش عن دارٍ بها القول والقيل = ياوي ديره مار ربي محقها
نزور أبو منصور ريف المقابيل = صباب سمن الضان على درقها
بصنيةٍ فيها ثلاثٍ من الحيل = ماتشال لولا أنه قويٍٍ حلقها
في مجلسه تسمع ضريس الفناجيل = في يد صبيٍ حمسته ماحرقها
المجلس اللي ماتجيه الدعابيل = غير الرجال اللي تتعب طرقها
العود يمشي بينهم والتعاليل = وسوالفٍ ما شابها اللي شدقها
شوق الهنوف اللي تجيب المحاصيل = عقول الرجال تجيبها من عمقها
ماهي من اللي طيبهن بالدحاميل = سبحان من سوِى نباها وخلقها
اللي حلاياها قليله مع الجبل = شجرةٍ عسى الله مايفرق ورقها
بنت الرحال متيهين المخاليل = السربه اللي تستريح بشنقها
عسى وطنهم للمزون المضاليل = غر الخشوم اللي يلهله شفقها
لين الرفيعه تتقي فالهماليل = تاخذ ثلاث شهور يمشي سحقها
من بيينهم ماتروح حتى المراسيل = تفجر القرنه وباقي خنقها
يروح واديها متل شاطي النيل = الديره اللي من عرفها عشقها
خيرٍ بليا شر حكمه وتنزيل = في جاه من شق البحور وفرقها
مدهال عجفات الظهور الإباهيل = غبوقة الخطار برصٍ شققها
وأيضا بها للجار شيمه وتدليل = على دلال الجار ما احدٍٍ سبقها
قصيرهم مارح يشكي البهاذيل = ولا شفق من الغربه وتالي رهقها
هم الرجال ولا عليهم مداخيل = البندق اللي ماتعض بفشقها
ثبتان ليا ركبوا على الحيل والخيل = مع بيرقٍ كل البيارق فهقها
على سروج الخيل مثل المهابيل = والا سكاررانٍ تزايد فسقها
يتلون ابو ماجد بعيد المناويل = شيخٍ له الشيخان ترمي علقها
هو الأمير وخل عنك الطهابيل = إما خذاها طيب وإلا وسقها
وجيه جاه وبالمهمات حلحيل = وذكره بعد صم الجبال اخترقها
ياويل برقا وروق عقبه ليا شيل = ويا ويل من له قالةٍ مالحقها
ماهو من اللي شيخته بس تظليل = ونفسه على ماله تزايد شبقها
ولا أخص فيهم مار أنا اقول تمثيل = واللي مشكك بي على مطرقها
ماقلتها بشيوخهم نوع تهزيل = ولاني طباخ الفاس يبا مرقها
شيوخهم ماتلحق بالمفاعيل = مار ان أبو ماجد سبايب غرقها
طلع عليهم طلعة البدر وسهيل = على النجوم اللي كثيرٍ دبقها
ولا يختفي بدر الدجا يابن منديل = ولا تختفي شمسٍ تبين شرقها

الشاعر/ عبــــــــد العــــــزيز حمود أبالــــــعون رحمه الله