ديوان الشاعر// عبدالعزيز بن حمود ابالعون

يا منيف قم هات القلم والسجله = عجل عليه يا مظنة عيالي
عجل ترى قلبي همومه تتله = تلة محوص مجويات المحالي
والله يالولا الهرج ما يقال كله = لا اقول يا نياف قولٍ يقالي
قولٍ يسجل فالعبر والأدله = ولاني بعن بعض المخاليق سالي
وشوله المرقاب يوم ارتجل له = دايم على راسه تقارش نعالي
كني مدور بالخلا حاجةٍ = قمت اتهور بالجهل والخبالي
خصٍ ليا منه شبا العود ضله = كن المنادي فوق راسه ينادي
والدمع من راسي عيوني تهله = هلة هماليلٍ حشرها الخيالي
واوجس بصدري فوح مار احتمله = وباقي السوالف ما تصور ببالي
ماني مسجلها بصفحة مجله = يقرونها كل العرب والأهالي
والهرج هو سهمة خبيث الجبله = يشيل والا يجيب علمٍ يشالي
خله يروح وكل سلك بمشله = ما فيه خير ولاش شيٍ غدالي
ولا عانيٍ ليه ولا عانيٍ له = لا صد أنا صديت لو هو قبالي
اكويه بالهجران كله رضاً له = كية نكب والنار لها اشتعالي
وان زان زنت وراح وقت الشكله = ماني حقود ليا لجا والتجالي
من شان ستر العرض ماهي مذله = رجال وافهم وش حقوق الرجالي
والقى لو أدور ثمانين زله = القى على اللي يوم دور لقى لي
هو يحسب ان علومنا مضمحله = وحنا عيال اليوم قول وقبالي
بالله يا نياف رحله وقله = يرحل والا ابرحل ودنوا رحالي
والهرج مابه خير دقه وجله = اخير ما للهرج صك المجالي
وشمة ذعاذيع الهواء براس تله = عندي لها قيمه على قد حالي
نبي لنا يا منيف جلسه ودله = وتعليلةٍ عند الأمير الموالي
اللي ليا جيته ينومس محله = ولك مجلسٍ بين الكنب والزوالي
ولا انته بعند الشيخ على ممله = كنك على ما قيل صاحب معالي
قولة هلا باللي يجي عادةٍ له = جميل والجميل يبا الجمالي
والنفس دايم للعرب مسفهله = ورعه وراعيها من الكبر خالي
واليا اشتبك حبل الجماعه يفله = بالجاه والحيلات والا حتيالي
وجيه جاه ومطلبه حا صلٍ له = واليا اهتوى باسه يشق الجبالي
رباح ما جابنه البيض لله = في جيل دور اليوم مثل الهلالي
عندي وكلٍ له هوايه بخله = دريت عقب احصيت وش راس مالي
هو شيخنا ليا قلدن الأجله = ليا جاء النذير وصار للعلم تالي
سبعٍ تخاويه السباع وتدله = ما شيخته شيخة خطاة الكحالي
لعل خطو المنتسب فدوةٍ له = اللي عن المكتب يصيبه جفالي
ما غبر كبر وزوم والنفس عله = ما به من الثنتين شيٍ صفا لي
ليا قال قولٍ ما حماه وفطن له = مثل الهواء ما ينمسك بالحبالي
هذاك ودك مع وريده تغله = غله ولي العرش رب الجلالي
والا انت ما بك عيب والكامل الله = كامل بفعل المرجله والكمالي
وعيبك ليا جاء للجماعه عضله = درعٍ لهم يلبس نهار القتالي
نجمٍ بدا بين النجوم المطله = عليت يا حبس النجوم الشمالي

الشاعر / عبدالعزيز بن حمود أبالعون ,,, رحمه الله