ديوان/ ابراهيم بن محمد السليمي .

ياذيب ياللي تقتنب فـوق شاهـوق=صوتك سرابي والضمايـر شعقهـا
سببت لي بالقلب صادوف و حروق=وقامت هواجيسـي تصفـح ورقهـا
نبرات صوتك جابت الحزن والشوق=والليـل والبيـدا ونفسـي زهقهـا
قال المثل بالناس سابـق ومسبـوق=وكم واحدن له غايتـن مـا لحقهـا
لي كلمتن بالصدر من عصر فاروق=مـن سدهـا لليـل رحـب شفقهـا
جارتبي الدنيا علـى ديـرة العـوق=مشذوبتن عشـق اليبـاس بورقهـا
محرومتن لاخير لارعـود لابـروق=العـن شوارعهـا والعـن نفقـهـا
سبعة عشر عاما على الوجه صافوق=مرت مـن ايامـي وانـا معتنقهـا
حكم القدر جاري على كـل مخلـوق=ونفسي رضيه في حكم مـن خلقهـا
ياخال يا بوهلال يا تاجـر السـوق=ياشاعرن صلـف القوافـي طرقهـا
شرهتك فوق الناس والذايقه فـوق=ونفسك على الطيبات ربـي فلقهـا
لك هاجسن بالشعر وافي ومرمـوق=له جنتن بالشعـر طاغـي عبقهـا
يقطف من النوير ضاري ومسيـوق=مـا رام للـي فـي خفاهـا بهقهـا
اكتب لـه الابيـات واداري حقـوق=ولا اطاوله في تجارتن هـو فرقهـا
في عالي الصندوق مهتـز معلـوق=يم الربـوع اللـي يهـول حمقهـا
عدوهم وقت اللقـا حالـه محـوق=يوم الوجيه السود ضافـي عرقهـا
كم فارسن من بطشهم صار غرنوق=من شيختن بالـدم ينـدى فشقهـا
ربعي قبيلة حرب ربعي هل الـذوق=ربعي على الطالات محـدن سبقهـا
حماية المضهـود عشاقـة النـوق=دخيلهم مـا خـاب لحظـة نطقهـا
حقه برد الصـاع وافـي وملحـوق=وكم شيخ منهم عن فناهـا عتقهـا
رجالهم بالحب لـه شـي معشـوق=شاف المراجل بنت عـم وعشقهـا
من لامني فيهم من الناس ممحـوق=نفسه عن العليـا تطيـح وفهقهـا
كتبت ما بالقلـب بالشعـر طـاروق=مشاعـرن فيهـم تنمـى عذقـهـا
يالله جملنـي سنـد كـل مخـلـوق=فختامهـا يـوم الرديهـي طرقهـا