ديوان الشاعر / علي بن زيد الحربي

هذي القصيدة مسندة للشاعر نائف بن جربوع الطريسي

يا إله الكون يامنجي دخيله=ابتدي بإسمك على كل المعاني
ياكريم رابح من يلتجي له=يامجازي اهل الحساني بالحساني
وعقب ذكر الله تعليت الاصيلة=وابتديت اشرح كلامي في بياني
مسندٍ قولي على صاحب نفيله=فاهم يعرف مداخيل المباني
مايتعامل مع رفيقة بالهزيله=مايجيب الا الجزيلات السماني
نائف الجربوع وافي مع عميله=لإجل هذا جيت له بالعلم عاني
يالطريسي بالاساليب الجميله=حرك المكنون ياسهيل اليماني
العمار تزول والدنيا طويله=العمار الى انتهت مثل الثواني
والليالي كل ماتجيبة تزيله=والموارد تنتهي والعمر فاني
والحمل ماكل واحد يرتكي له=والسواعد بينهن هادم وباني
والرجال اشكال كل له وسيله=طيبهم وافعولهم مثل المباني
فيه رجال على قده حصيله=لايزيد ولايعين ولايعاني
واحد مايزيد خيره عن خليله=مايجود ولايدين ولايداني
واحد وافي ووقفاته جزيله=لايضيم ولايضام ولايهاني
يارفيقي مالنا بالوقت حيله=الحمول اثقال والوقت ايحداني
والامور اللي بنفسي مستحيله=والضروف اتحد ذربين اليماني
والرجال اللي على مبدأ قليله=والبواخر ماتحملها المواني
امس جالي واحد يومي شليله=قالو انه عيد لكن صار هاني
يوم شفته قلت مايوجد مثيله=لابس بشته وشكله مودماني
ما اعرف طبعه ولا اعرف له قبيله=لكن انه فيه لطف وبه لياني
قو نطقه قو باسه قو حيله=اعجبنّي واحترمته واحتواني
فارض قدره وتقديره زميله=له كفيل لاضعيف ولاهو اناني
لكن المكفول ماجمل كفيله=واختلاف الوقت من بادي الزماني
يوم مسينا الحبال وشال شيله=عود وضيحان يرثع بالاواني
وفي نهار اليوم نبحث عن بديله=عند امبدلة التهامي بالعماني
صار درس وكل دم له فصيله=يالمعيدي كيف اراك ولاتراني
من حلب عنزه حليبه في صميله=باقي عنده وانا ربي كفاني
ادري ان السيل جنب عن مسيله=والكديش مسرح مع الحصاني
والضواري والفرايس بالخميله=والرسن مطلق ومفلوت العناني
والرجل ياصاحبي قلبه دليله=وانت تفهم ماقصدته من معاني
جاك علمي واعتذر عن كل ميله=لاتواخذني على زلة لساني

وهذا رد الشاعر نائف الجربوع

مرحبا واهلا عدد وبل المخيله=بالمراسل يوم مرسوله لفاني
مرحبا بك ياعلي في كل ليله=وكل يوم وبالدقائق والثواني
يوم حركت القطار ودار ويله=وشال ميزان المعاني مرجحاني
ثم قررت الخبر يمي تحيله=والقلم فسر هدف نطق اللساني
وانتصاني بالعبارات الثقيله=ماقدرت اخالفه ساعة نصاني
انجبرت اوقفه واعرف مديله=واتحقق بالمكان وبالزماني
واعرف حمله وزنه اتحليله=ثم اسجل له بعد علمي بياني
إن نوينا نازنه والا نكيله=نضبط المقياس في فن وضماني
ياعميل ما اعجبه عملة عميله=شاري بعشرة وبائع في ثماني
يوم ماحصلت واحد تشتكيله=بعد ربي غير انا والعلم جاني
لازم ابحث فوق الارض المستطيله=عن عميلك صاحب الاسم الفلاني
العميل اللي ذكرته كيف اجيله=وانت ماحددت عنوان ومكاني
هو جدي والا نحو مطلع سهيله=غرب شرق بعالية والا بطماني
وين ربعه من شهوده من كفيله=وعسى ما يكون من ............
ولو لقيته كان شبينا الفتيله=واحترق راس العميل المغلطاني
وصار باق الجسم في وسط المليله=لين يابس ماتحصل به لياني
مير سلم لي على حضرت وكيله=وبلغه مني تحياتي علاني
وقل لابوزيد الهلالي عزتيله=من سلاح لافتيل ولاسناني
ولايعد من القواطيع الصقيله=كيف شافه في عيونه هندواني
وانصحه قل له سلاحه لايشيله=وشر عليه ايبدله بسلاح ثاني
انتهى علم مشابه له مثيله=لعبة الشطرنج والا الصولجاني
وبارق مااسقى الضوامي لاتخيله=والوفاء معناه تحقيق الاماني
وان بغيت الظل شف شجرة ظليلة=غصنها بيمناك ماهو خيزراني
والزمان اليوم راسه عند ذيله=واهله من دون راسه بالمثاني
لاتعاتب بالدهر نمره وفيله=يمكن المجني عليه ايصير جاني
واترك البستان شوكة في اكليله=راعي البستان يشري له سواني
ولاتعزل سكره عن حنظليله=كل صنف له زبون وله عواني
اطلب اللي مدته مده فضيله=واحدٍ ماشاركه بالملك ثاني
سعد من في جنة الماوى نزيله=شاري عمر بدأ من عمر فاني
والقطوف الدانيه حوله ذليله=تجري الانهار من تحته باماني
عنده الكوثر وعنده سلسبيله=وزوجته عنده من الحور الحساني
تم مضمون الكلام ونظم قيله=رد مني مثل ما المرسل عطاني