قصيده وجهتها للشاعر خلف العنزي

من فوق جيبٍ معتني به خبيره =متعدي الإلفين باربع موديلات
ناقيه من جملة جيوباً كثيره= وسجلت شيكه بعد شفت الضمانات
أوراق فحصه وقعت من مديره=فاحص عليه مهندسه بالجهازات
اجتاز كل الفحص قبل الظهيره= ومن المرور مخلصينه بلحظات
ارسلت من يقطع عليه المسيره = مايمل لو طالت عليه المسافات
لاقلت تكفى ماتعقد نظيره =ضاري على مشي الدروب البعيدات
قدام نور الصبح يطلع نذيره =مشي عسى ممشاه كله سهالات
غير الكتاب وسايقه مع سبيره=عليه ماحطت حمولاً ثقيلات
ياسايقه لاجيت ذيك العشيره =عيال وايل كاسبين الجمالات
ستر العذاري في نهار المغيره= لا سيقت العطفه ولجوا بالاصوات
فوق المهار وبالسيوف الشطيره= ياما خذوها غصب ماهي حيالات
يجذبك يم معشي الضيف نيره =الخمعلي ريف الركاب الهزيلات
عليه سلم لي مدله قصيره=وعطه الكتاب اللي معانيه جزلات
خلف زبون اللي ظروفه عسيره= ان حدته سود الليال المخيفات
يا لخمعلي جاني على الشعر غيره =كثرت قنواته ونشر المجلات
كلاً على الساحه يدرهم بعيره=اهم شي ايشاف باحدى القنوات
نشوف ياريف الخوي يامجيره=اللي على الشاشات يظهر على الشات
لاقلت ماهذا الشعر صرة عيره= وقالوا زمان اللي تبي ياسعد فات
حاسوا وداسو يالثبيتي مريره=اجسام دون عقول فوق المنصات
وامثالكم شعار شبه الجزيره=اللي لهم على معانيه بصمات
محاربين من الوجيه الشريره=والعذر عصر العولمه والحدثات
اعذار يامشكاي عمي البصيره=معادلين الطيبه بالرديات
قلته وانا يالقرم ماني سفيره=ولاقول فيه ارقبت روس الطويلات
ياناضمه ياناقده ياخبيره=وجهة نظردونتها وسط الابيات
رايك عسى رايك لنا فيه خيره=حيثه يجي صايب والافيه هفوات
حنا نجيب الاوله والاخيره=ولاالسكوت اخير في بعض الاوقات
والعذر منكم يالوجيه النويره=اليا حصل تقصير منا وغلطات