من قصائد الشاعر الكبير/ بدر بن عواد الحويفي الحربي

حبيت اقدم لكم هذه القصيده الرائعه لشاعرنا الكبير وعلمنا : بدر بن عواد الحويفي

يا رَجل لا تنقل نبا كـل نقـال=به ناس حتى الميـت مايتركونـه
والقيل عندي له مفاتيح واقفـال=معناي ماكل العـرب يفهمونـه
ولا أقول أنا زايد على كل رَجْال=كم واحدٍ مايقصر العرف دونـه
خص الرَّجال اللي يجيدون الأمثال=البيت عن معنـاه مـا ينقصونـه
أخص لي ناسٍ يحوسون الأقـوال=البيت لو هو معتـدل يكسرونـه
لو هم كبار أعمار بالعرف جهال=ومن عمي قلبه ماتفيـده عيونـه
وان شفت لي شخص خيالي وخيال=ما اشفق عليه ولا تدخل بشونـه
ينبيه عن حظه تواريـخ الأجيـال=يجهل خبـر والنـاس مايجهلونـه
يشوف نفسه وين ما مثله امثـال=ترميه باحضان الجهالـه ظنونـه
والناس تعرف بالطبايع والافعـال=واللـي تعـزه سمعتـه يمدحونـه
والماء يجيبه عذب ويجيبه احثـال=والكون به من كل كايـن نمونـه

رائعه من روائع الشاعر بدر الحويفي