عبدالإله الشريف & ماجد أبو مديدة

لحنين جرت بين أخوكم
عبدالإله الشريف والشاعر الرائع ماجد ابومديده
أتمنى أن تنول إعجابكم

عبدالإله الشريف=
جينا على حين موعدنا = حسب الذي كان فالترتيب
نلقي التحية ويسعدنا = نعطي في رسم المثل ونجيب
ماجد أبومديده=
عادتك تِشبه عوايدنا =وافي وعند الوعد ماتغيب
ترحيب والطيب شاهِدنا =والقيل في قِمة التهذيب
عبدالإله الشريف=
على حسب ماتعودنا = منك الوفا والكرم والطيب
ياشاعرالجيل ساعدنا = وأفيدنا بخبرة التجريب
ماجد أبومديده=
معاك غاية مقاصدِنا =والظن في مثلكم مايخيب
وإن كان حددت حددنا = فوايد التجربه ياذيب
عبدالإله الشريف=
حبيّب الروح مجهدنا = يتعمد البعد والتغريب
كل ماقربناه يبعدنا = ويردنا مطرح التعذيب
ماجد أبومديده=
الوِد دايم يعاندنا = يخطي مع أهل الهوى ويصيب
إن ما سعينا وكابدنا = نشيب وألآ الغضي مايشيب
عبد الإله الشريف=
كم للمآسي تكبدنا = على أمل نهتني و نطيب
لكن بلانا في حاسدنا =نبني ويسعى على التخريب
ماجد أبومديده=
راعي الحسد لو يهددِنا = عن الأمل مالنا تجنيب
بالصبر ماهو معقِّدنا = ونقضي على حِسبة الحسِّيب

اللحن الثاني

ماجد أبومديده=
كرّست جُهدي ومجهودي = مِستهوِن البُعد لجل أنسا
في ظرف لحظه نحل عودي = ومالقيت غير الآسا مرسا
عبدالإله الشريف=
الحظ جابك على حدودي = لحظة عليك الأسى أمسا
لاتقول أنا كلت جهودي = خليك وقت الشديد أقسا
ماجد أبومديده=
لا ياسنين الفرح جودي = وألآ أهمِسي بالسعد همسا
دمعي تهامل على خدودي = ولازال جرح الزمن يحسا
عبدالإله الشريف=
سعادتك جل مقصودي = يامشتكي الظيم والبأسا
لاتطري الياس في وجودي = دنياك فيها فرح لِسّا
ماجد أبومديده=
معاك ماتقصُر زنودي = لكِّن الأحوال مِّنتكسا
شوف الألم أصدق شهودي =يحمِّس في جوف الحشا حمسا
عبدالإله الشريف=
أدعيلك الله في سجودي = يجعل بعد ضيقتك أنسا
وأيامك السود يالجودي = تشرق بعد ليلها شمسا

ويصحابنا سامحونا