بمناسبة طلّة ورجوع المنتدى رغم أنف الحاقدين ......... ؟؟؟

السلام عليكم ورحمة الله وبركاته
مساء الخير للجميع
كلنّا يعرف ما سببه شخص عديم المسؤوليه عن توقف
هذا الملتقى الشامخ لقبيلة حرب ولمحبين الشعر
وما سببه .... ؟؟؟
اليكم قصيدتي بعنوان
( ياصاحبي )

ياصاحبي ليه البشر تحمل أحقاد=وقلوبهم مثل الحجر بالجمادي
لو للعرب عينٍ تناظر للأحساد=ماكان شفت الحِسد في كل وادي
أقفى زمان اللي بهم علم وجهاد=وجانا زمان الدان والرقص عادي
لاني بنظامٍ ولاني بقصّاد=ولاني من اللي ينطق بشي غادي
أنا وريث الشعر جدٍ على أجداد=ياللي تقول الشعر ماهو بلادي
أصيد فكر الشعر بعيون صيّاد=وأترك مساحه لصيدتي للهدادي
أقولها من واسع البال بإنشاد=وينشدبها طيرٍ بالأغصان شادي
سلام ياربعي سلامٍ للأجواد=سلام لأهل الطيب وأهل المبادي
أفعالكم تشهد بها كل الأمجاد=ونوماسكم تاجٍ برؤوس الأعادي
ياعل جمعتكم على الخير تزداد=وياعل نار الحقد تصبح رمادي
والعيد عاد وعادة العيد تنعاد=عيدٍ على عودٍ بطيبٍ وكادي
والعيد عاد وطلة العيد ميلاد=ميلاد لأفراحٍ تهل بفؤادي
وبختامها صلّوا على سِيد الأسياد=خاتم رسالة ربّنا للعبادي

طارق الرزقوي الحربي
( فيض المخيله )