حنا عرب لاهل الردى مانجاري - ولانجازي بالردى لو يجازون

السلام عليكم ورحمة الله وبركاته ..

اليكم ماعندي من جديد ..

القلب عيبه طيبته يوم اداري
وان مااعجبتهم طيبته وشيقولون
ما للملامه عند مثلي طواري
ولاني براضي بالقضيه وممنون
لاشك ابحفظ بالمجالس وقاري
يوم ان خلق الله ذهانا ويوحون
ولناقلين الهرج قلنا حذاري
دام الخطر بدري ولاناشه الدون
مير اختلف رغم الحذر كل طاري
والهرج يجرح كان ماهو بمازون
يردني سلم العرب دون ثاري
لو اجهل اللي بالظماير يكنون
حنا عرب لاهل الردى مانجاري
ولانجازي بالردى لو يجازون
ميقافنا دون الصديق انتحاري
والشيمه الشيمه لنا ساس واركون
وعن عرض خلق الله نسن الشباري
لو مالنا معهم نسب قرب مقرون
نبقى بدو لو مستوانا حضاري
ندرى العواقب مير مانقبل الهون
مانستمع بسلومنا لاستشاري
مادام وقفتنا بها العز مضمون
نخشى ملامة كل ناقم وزاري
واهل الخزى لو جابو العلم يخسون
الحر مايذعَرْه جول الحباري
والذيب يبقى ذيب لو له يصيدون
واللي يقول السالفه مايداري
تاه الهدف وامسى على الرف مركون
وان زان ليله واسعدته المساري
لابد ماياطى على الشوك مغبون
واقرب مثل عنها كلام الحداري
( من قال فيه الناس لازم يقولون )
وسلامتكم ..



بالنسبه للبيت الأخير يوجد به ذكر لشاعرنا العلم محمد شبيب الحداري
واعني به قوله في بيته الشهير الذي يقول به من قصيده طويله :

من قال بالناس قالوبه
ومن عال تاتيه عيّالي

وقد أصبح هذا البيت مثلا ً يضرب لوضوحه وجزالته ( سهل ممتنع )..
وبنيت بيتي الاخير على هذا المثل الذي نفخر
جميعا ً بأنه لأحد رموز قبيلتنا حرب الغاليه ..

أطيب الاوقات ..