واحدًا جابوه ودّوه مـدري كيـف قـال

بين شاعرين


عبدالله المسعودي ومستور العصيمي

المسعودي =
واحدًا جابوه ودّوه مـدري كيـف قـال =من هو اللي دفّ مستـور وندفّـه وراه
أخوياه ايدوّرونـه وهـو رايـح لحـال =ما خبرت اللي يبا يروح ويكبّ أخويـاه
مستـور =
ما خبرنا اللي يضيّق سريـع الانفعـال =من يقول العلم جاني منيـن العلـم جـاه
واشكل الاقوال يا ذيب ماهي راس مـال =من ظما لو يشرب البحر ما يروي ظماه
المسعودي =
الخبر والعلم تحـت العمامـه والعقـال =والعقال مع العمامه على راسـك هـذاه
من زعل قلة سعة يشتري له وسع بـال =قبل يقعد له زمانه على راس الحصـاه
مستـور =
ما على راسي يقع ما على روس الرجال =والعميل الوافي الناس ما تنقـص وفـاه
الزعل طيّب ومكروه في بعض الحـوال =والامانة ما تضيع على طـول الحيـاة
المسعودي =
أنت فيك طبيّعة من جـدودك والخـوال =لا غريبة تعجب الناس من قدر وغطـاه
إن عطتك كتوفها ما تربّطـك الحبـال =وإن توجّه لك نحرهـا تلحفـت العبـاه
مستـور =
وإن بدالك عوجة العوج في رقاب الجمال =مير من عارض بماعونه السيل امتـلاه
من تملت له غروبه تضارس به محـال =كل ما أوحى له منادي ينادي قال هـاه
المسعودي =
ما معي ماعون والوادي الممطور سـال =وانت كيف يسيل واديك وخيالك صحاه
والحبوب الصم لو قيمـة الحبـة ريـال =ما بلعها غير من تطحن الحبّـة رحـاه
مستـور =
لو زهمت أبكم يجاوب على هذا السـوال =كيف عاقل يلتبس ثوب ما فصل عـلاه
لن وصلك العلم عندك محايل واحتيـال =حيلة الحصني ليا شاف سبع الليل جـاه