الحاضرين يبلغون الغيابي / بعد مقتل الدرة بيومين

البارحه عيني قزا نونها النوم = وعيّا يجيها النوم من حر مابي
من سبّة اللي داخل القلب مرسوم = حبه وحب الشامخين العذابي
ويامجانب المعنى تريح ومخدوم = واحذر تتعب سابقات الركابي
الله لايجزاك بالخير يالبوم = اللي فعايلك الخنا والخرابي
المسجد الاقصى ينادي ومحروم = وين الرجال ووين عزم الشبابي
اللي لهم عزم وعزيمة على الدوم = عزماً تعدا ناطحات السحابي
الله ياكم واحد بات مظلوم = في القدس مابين العرا والترابي
وكم شايب بايت على الغبن مكلوم = يشكي فراقٍ بين الاضلاع ثابي
وياكم من عذراء سقت كاس مسموم = كاس المرار وكاس بالاغتصابي
وياكم طفلاً يسكب الدمع مهموم = مهموم مايقدر يرد الجوابي
ومحمد الدرة نهار امس ياقوم = شفته صريع من اليهود الكلابي
ضميرهم ضامر وسلبي ومعدوم = واقسمت مافيهم ضمير ايجابي
إلاّ ضمير الشر والعنف والشؤم = مخالفين لشرعة اهل الكتابي
صهيون فيهم جبن خواف ورخوم = اليا احتمى الميقاف مثل الهلابي
وترى جميع العرب يغشاهم اللوم = ان كان ماهبوا لصد العذابي
وياربعنا ماهي سواليف وحلوم = الحاضرين يبلغون الغيابي
نظمتها في العقد عشرين منظوم = وادرجتها حسب العدد في حسابي
هذا وانا ماني من الذنب معصوم = وارجو من المولى العفو والثوابي
وصلاة ربي عد ماتزهر نجوم = واعداد ماتنبت حقول وجنابي
على رسول جا وبه ختم مختوم = ختم النبوه بين الاكتاف نابي