( فلسفه )

يا الله انا طالبك عفوك يا كريـم ويـا قديـر=انا الضعيف لرحمتك وانته وسيـع المغفـره
طالبك غفرانك ومرضاتك وتيسيـر العسيـر=وتوفيق ما يرضيك ياربـي وعيبـي تستـره
انت العليم انت الحليم انت الخبير انت البصير=وحنا عبادك ان تشاء نبصر بشـيٍ نبصـره
وقفت ادير الفكر في بحر الهجوس المستديـر=امسيت في غبة بحر وهجوس فكري مبحـره
ومن باب علم الفلسفه حللت موجات الاثيـر=وارسلت موجه ثانيه عبـر الاثيـر مشفـره
الموجه الوسطى تلاقطهـا رمـوز المستنيـر=والموجه العليا علـى رمـز الفهيـم مسيـره
ما جيتها بطره ولكن جابها صـوت النذيـر=وماينوخذ بعد النذيـر الا الطيـور المخمـره
الى متى وحنـا كـذي لا نسيـر ولا نطيـر=حنا بعالم عولمـه والصـوت لازم نجهـره
ياكبر شرهتنا وحنا بـا الاثـاره مـا نثيـر=ويـا طلـع نـادر تخلينـا ولحـدٍ عـبـره
امجاد من كانو قبل ماصحت الجيل الاخيـر=المجد يصنع كل يوم ولليالي نذخـره
فينا انانيـه وفينـا خـوف منقطـع النظيـر=شـوارد الافكـار فينـا مـا تهيـد مذيـره
فجوه كبيره فارقه بيـن الموظـف والمديـر=ومن قال ابي حقي يقال اليوم يكتب محضـره
واليا جلس راس الفتوه قال ما معيـه خشيـر=انا المعلـم والكبيـر انـا تـراي المفخـره
قالولنا منصور قلنا يا عسـى خيـره كثيـر=نبي نصوت مع جماهيـره ونعمـل جمهـره
قالوا عسى الله يرزقه قلنا ترى ماهـو فقيـر=الذيب ماعابـوه فـي فقـره ياقالـوا مفقـره
هذا وانا ماني وزير ولا معي رقـم الاميـر=ولاني بدكتور العقـول ولا درسـت الدكتـره
هذي روايه من رواياتي ماهي من شكسبير=جوليان مايذكر بها وجولييـت فيهـا ماذكـره
قصه قصيره لابسه بشت الـوزاره والوزيـر=فيها البطل منصور قولوا ياعسى الله ينصـره