ديوان الشاعر/بدر بن عواد الحويفي الحربي

القلب يالصاحـب لـه ايـام مزنـوق=ماهو منشطنـي مـن العـام سوقـي
والـرزق بالدنيـا تقاسيـم ووفـوق=نـوبٍ تكايدنـا ونــوبٍ تـروقـي
وعناية الخالـق علـى كـل مخلـوق=محيي الهشيـم ويابسـات العروقـي
ياللي هضمت الطير والطير مـرزوق=الطيـر رزقـه بالجنـاح مخلـوقـي
من يـوم قـل الصيـد ماللولـع ذوق=وش عاد لو حطيت طيـر وسلوقـي
راح الولع مع دور مشعان وصفـوق=يـوم الحبـاري بالمنـادي فـروقـي
ذاك الذي يطرب له البـال ويشـوق=والطيـر يسـوى قيمتـه ومعشوقـي
واليوم دور الطير فاشـل وممحـوق=كثـروا صقاقيـره ولامـن اوفوقـي
وبعض صقاقيـره يحبسـه بصنـدوق=ضايـق بمنقـاره يعـض السبوقـي
لو هز راسه للفضا وانتهـض فـوق=ريشـه دمـار وبالربـاط مخنوقـي
نسره لحم مطبوخ والوكـر طابـوق=وسيـمٍ يتلـه بالكـراع محـزوقـي
من عقب مضياحه على راس شاهوق=اليـوم ناقـص واجبـه والحقـوقـي
يلعب به الجاهل مع الديـك مرفـوق=الطيـر مخـدم والدجاجـه تقـوقـي
من شوفته كني على الوجه مصفـوق=صديت من عيني تـذارف ارموقـي
حكمه بيد غيري ولا ابرمت منطـوق=هزيت راسـي والضميـر محروقـي
من يوم جهّال الولـع جالهـم سـوق=اللـي يحسبـون البواشـك اشروقـي
الطير لـه نـاسٍ تعرفـه ومرمـوق=اللـي ولعهـم بالصقـاره عمـوقـي
يسوقهم حـب الولـع للولـع سـوق=خـصٍ ليـا قامـت تلـوح البروقـي
كان اجنبو لمسـو مداليـج ساحـوق=وشمال من غرب الصحـن للحدوقـي
برضٍ مراتعهـا تفهّـق بهـا النـوق=كبـار الظهـور مقوّسـات العنوقـي
لهل الولع فيهـا مساهيـج وطـروق=وقـت الخضـار وللبذيـره بهوقـي
العـام لـي معهـم علاقـه ومعلـوق=واليـوم اودعهـم وقلـبـي يتـوقـي
ينحاه مع درب الولع حـب واخفـوق=وعلى الصقـاره والنشامـا شفوقـي
قلبي على شـوف القرانيـس مفتـوق=اللـي طلبهـن يعطبـنـه لحـوقـي
مسرولات اكعوبهن حجـل واسبـوق=حرش الكفـوف مدًلجـات الشدوقـي
وصدورهن جثلات والمتـن مفهـوق=واقحوفهن مثـل الكهـوف الطبوقـي
والريش طلق ادقاق والبـوز مذلـوق=والروس بيـض وبالمواسـي دقوقـي
عقدٍ محازمهن لهـن سلـف وشنـوق=فـج المناخـر ضافيـات الشنـوقـي
منهن زعيم الجـول ماهـو بمعتـوق=من ضربهن كنـه برمـح مخشوقـي
دفق الحمر منهن على القـاع مدفـوق=مثـل الخناجـر مزرهـن للعروقـي
انسى سوالفهـن ولا جيـت ابـاروق=يشّـر عليهـن يالنشامـا خفـوقـي
لكن حصل لي من ظروف الدهر عوق=وانا عليهـن يـذرف الدمـع موقـي
حل الولع يوم الولع قطـف زملـوق=واليوم راع الطير صـدره يضوقـي