ديوان الشاعر/بدر بن عواد الحويفي الحربي

يقول الشاعر جزاء صالح مسنداً على بدر الحويفي:

يابدرما انتـه والعـذارى ولايـف=عنهن تراك ابعد من الجدي لسهيل
وفارقت لامـا مترفـاتٍ عفايـف=بيض العواتق لا بسـات المفاتيـل
نجل العيـون معسـلات الشفايـف=وخدرات الأعين والحواجب مكاحيل
اللي عبثهن بالقلـوب الصخايـف=وكلٍ شكى منهن عذاب وغرابيـل
ولو القلوب اجبال صارت خفايـف=وياما غدن بقلوب ربـعٍ حلاحيـل
والا بليد القلـب عنهـن مسايـف=ولا شوّقه دعج العيـون المظاليـل
وانته على ماقيل شايـف وعايـف=وعن الركاب منزلالشيـل تنزيـل
ليا صار متنك صاير لـه سنايـف=وتدبح بمشيك واللأحجـة مشاهيـل
والزول مهدف والتراكـي نحايـف=ونظارتك سودا مثل حالـك الليـل
وجسمك مثل عظم تضبّـه كتايـف=ولا باقي الا هيكلـك والعصاقيـل
ومن كبرك سنك ماتبيك الوظايـف=والواسطه مالـك عليهـا مداخيـل
وعليك من سرحان بعض الوصايف=الذيب الأشهب فيـك منـه تماثيـل
ولو شافن الخفرات ماكنت شايـف=مايقبلنك لو قضن عمرهـن حيـل
ماهو ردا بك ياذرى كـل خايـف=عند اللـوازم نعرفـك بالتفاصيـل
من روس ربعٍ ياخذون العطايـف=وياما اتعبوا من سبّق الهجن والخيل
وفعولهـم بمصقـلات الرهـايـف=ليا طوحن سمر العذارى الهلاهيـل
وليا اعتلوا فوق المهار الزغايـف=يردون ساحات الوغى بالمصاويـل
ما ارزقهم بالحرفنـه والحرايـف=ولا يزرعون الحب وسط المشاتيل
وانته حفيد اللي عليهـم حسايـف=ولا افضّل الميت على الحي تفضيل
زبن الدخيل وموميـات السفايـف=ومدهال طلقين الوجيـه المشاكيـل
وسوالفك عنـد النشامـا طرايـف=طرايـفٍ مابيـن شرابـة الهيـل
مافيك ماينقال وابيـض صحايـف=صحايفك بيضا بيـاض الفناجيـل
لاراجـيً منـك ولانـي بخايـف=انا اشهد انك من خيار الرجاجيـل
سبعٍ تعشى وان هبا كـل خايـف=لاشك كبر السـن مافيـه تجميـل
ويوم الصبا وانته رقيت المهايـف=ومعاك في كشف المسافات دربيـل
يوم الفزوز اللي تـرب الحتايـف=تسري وتصبح قدمهـن بالمداهيـل
واليوم عصرك يافتى الجود طايف=واسمح لغيرك قبل يوم المراحيـل
واحذر تعـدي بالرجـوم النوايـف=يمكن علينا تجفّل الصيـد تجفيـل
ورزقك على اللي مايدينه قظايـف=اللي حمى ركن الحرم من هل الفيل
واسلم وسامح بالمـزوح الخفايـف=نبـي سوالفنـا طرايـف تعاليـل
ترى على مثلك تجـوز العجايـف=والا الردي يابدر مابـه محاصيـل

ورد عليه الشاعر بدر الحويفي:

جزاء غزاني شاف غـزوي نكايـف=عنده خبر معرض عن القول والقيـل
ساقه علينا من هواء النـود طايـف=نـوٍ ثقيـل وفيـه بـرق ومخاييـل
وساسي حجر ماهو عشاش وصرايف=يهزهـا دفّـاع الامـواج وتمـيـل
ياللي بحـال العـود مانتـه برايـف=علي ينخونك بعـض نـاس بالتيـل
يبي علـى راسـي يلـف اللفايـف=طاوع صديقه والتمس منـه تفصيـل
بمكبرات الصـوت يرسـل قذايـف=وركز مواقعهـا علـى غبـة النيـل
صارت صوايبهن بجنبـي خفايـف=مرن ولا ضـرن سلامـه وتسهيـل
يارجل بالشيبان ويش انـت شايـف=زمل الحمول ليـا رغـن المخاليـل
مـن لايعـوه بشلفهـم راح عايـف=ليـا دبـرت خيـلٍ وخيـلٍ مقابيـل
قطاعة الصحراء وجـرد الحتايـف=اللي بها حـرش الأفاعـي مشاويـل
وعندك خبر يوم المعوشـه خطايـف=ايام غـارات العـرب والمصاويـل
ومن شب شاب وذاق عجز وكسايف=ذي سنة الدنيا وجيـلٍ بأثـر جيـل
وعندك خبر للجيـل الاول خلايـف=ارجال ماتوا والخلايـف رجاجيـل
ياللي على اسلوبكـم بـه جحايـف=يبحل به اللـي مايعـرف التحاليـل
هوم لو هـو مـن قلـوبٍ نظايـف=ابعد عن الشكه من الجـدي لسهيـل
محدود مايلمـس حقـوق الطوايـف=مضمونه الواقـع امـزوح وتعاليـل
موضوع ماله يـم غيـري هدايـف=تعليق من صاحب لصاحب بتسجيـل
يقول شايـب واحترمـت الوظايـف=والرزق عند اللي تكفـل اسماعيـل
وان كان عندك غير هـذي لغايـف=ياصاحبي لا تكرب الحبـل بالحيـل
مافيـه داعـي للأمـور العنـايـف=العنـف يثـر بالصاقـه عراقـيـل
خل الهدف بينـي وبينـك مسايـف=تـرا الجمـال عيونهـا للجماميـل
والعرف قـدوه للرجـال العرايـف=وانتم عـوارف ماعليكـم مداخيـل
انتم رجال العـرف مانتـم عذايـف=اهل وفـا وسلـوم قـول ومفاعيـل
وصوغاتكم دايـم تجينـي غلايـف=واليوم صوغتكم بهـا نـوع تشكيـل
مهمـا علـى تـدورون الحـوايـف=مانـي معاتبكـم بــرد التماثـيـل
وانا من الموضـوع مانـي بخايـف=اخاف يجهل وضعنا سـاري الليـل
وتصير قصتنـا مقيـض ومصايـف=نزهـة فـراغ مجمعيـن الدهاويـل
ناسٍ تـذوق مـن بحرنـا غرايـف=جهـال تفتـح للسوالـف سرابـيـل
السالفة لو هـي مـزوح وطرايـف=لازايـده وزنـه ولا ناقصـه كيـل
تفسيرها عنـد العقـول الصخايـف=كبر الجبل لو هي كبر حبـة الهيـل
لاكـن عليّـه لاتـحـد الرهـايـف=انا محملنـي شقـا الحـظ تحميـل
وموسـرٍ عـود القنـا بالكتـايـف=ومسلّم امري رب موسـى وجبريـل
حقي من البيض الحسـان العفايـف=دور انتهى ماهـو مغـازل مهابيـل
ماهـو غـرام بالهواتـف خرايـف=واحلام بسلـوك الهواتـف مراسيـل
اخـص راديـن العقـول الخفايـف=اللـي محبتهـم سماجـه وتضليـل
والا الرجال اللي سيّرهـم شرايـف=تمنعهـم الشيمـه وسلـم الرجاجيـل
وحكمك بوضعي يارفيقـي سرايـف=اول هجوم وتالـي الـدور تجميـل
خطة نشامـا مابهـا زيـف زايـف=تشـاورو واومـو لنـا بالمنـاديـل
وارسلت روس اقلام مامـن كلايـف=وارجي السموحه يارفيقي عن الميـل
ماعامل الطيـب بسـود الصحايـف=اهدي له الصوغـه تحيـات وكليـل
لو كـان حـر ولا عليّـه حتايـف=ارتّل المعنـى عـن النقـد ترتيـل
وارضي بميزان النصف والنصايـف=ماني عوج يحتـاج نظـره وتعديـل
وان جنبـت مانـي عليهـا مهايـف=ماحمّـل العاقـل شمـات العواذيـل
غيبـي بعيـد ولا بنـودي قظايـف=مـع احترامـي للنشامـا المشاكيـل
والطيـب ادمـح زلتـه والعجايـف=والا الردي شوفـي بعينـه سماليـل
في حاله الين من نسيـج القطايـف=وفي حاله اقسى من جبال البرازيـل
وتمت وصلـوا عـد وبـل القنايـف=علـى نبـيٍ نفـل الديـن تنفـيـل