ديوان الشاعر / إبراهيم الردادي ( بيان الصمت )

بسم الذي أنعم علينا بالاسلام=هذي نصيحة هادفة من معانيه
يامن بشبه الظن تصدر للاحكام=أظهرت عيب النفس والعقل لاغيه
مقامنا ما توصله لو بالاحلام=مادام ذا عقلك وبالفعل تبديه
فهمك على الظاهرمخالف للافهام=اقصر على قدرك ومالك بعاليه
ياسك طغى بالنفس واعتادت أوهام=صغر النفوس يحد راعيه للتيه
للنفس خالف في حسابك ولو ضام=واحفظ مقامك كِبرها لا يوطيه
مضمونها بالفعل ماهو بالاجسام=ترمي مقالاتك وماضيك ناسيه
في رجعتك للحق تحظى بالاحشام=وراعِ المعَانَد في الخطا كم يرديه
جوِّد أمورك وادرس الدرب باحكام=شر المواقف يخدعك زين باديه
واحسب لخطواتك وبالهون قدام=يصعب عليك رجوعها ومن تناديه
حياتنا بدروس في سر الأيام=متى عرفته خذ من العلم واعطيه
ترى العمر محسوب بانفاس وسهام=خلِّ التجارب واعتبر قبل تاليه
العقل نعمة يعقل النفس مادام=أخذ بشرع الله وطبق مباديه