عن ماجد الهواش مالي معاذير

عن ماجد الهواش مالي معاذير
البعد يطوى والعزيمه قويه
والله لو دونه طويل المشاوير
لاجيه دام النفس حره وحيه
ضاري على رد الوفى يالمناعير
وياكثر من له دين باقي عليه
ياليت تنبت لي جناحين واطير
ومخباى دايم بالدراهم مليه
وافي مع الوافين قبل المقادير
وطى السجل لمرحله برزخيه
شوحي سما مابغى مع الناس تقصير
مع نايد الاجناب والا اهليه
موجز وبعده مرحبا ياجماهير
ومية هلا مقرونتن بالتحيه
بضيافة اللي ماحسب للمخاسير
حجاج يضحك والايادي نديه
واقف يرحب في ضيوف ومسايير
والعود يبرا الدلة الشاذليه
شاعر يصخر كايد القاف تصخير
عليه من هواش شعر وسجيه
ابوه جعله عن لهيب وزمهرير
له يا اله الكون يشفع نبيه
مامات من خلف عيالن بهم خير
مثل الحرار عياله الصيرميه
والطيب عاده بالوجيه المسافير
اهل المليحا طيب روس وحميه
ياما جدعو من دونها من مغاوير
بحدب السيوف وسلة النافعيه
لهم بواد الحمض هيبه وتاثير
يوم الرماح العلط والبندقيه
وفاضو على واد الرمه بالخواوير
ماجاهم الوادي بلاش وهديه
حموه في ضرب القنا والبواتير
من فوق خيلٍ لطراد معبيه
ونصره لدين الله وقادة طوابير
مع الامام بجمع شمل الرعيه
حقايقن فيها وثايق وتقرير
تنبيك يالنشاد نجد العذيه