مساجله مع الشاعر صالح براك المحمدي

*الشاعر صالح براك المحمدي*

*افتخر يوم ان ابو تركي زميلي*

*يوم ضمتنا سنَوات الدراسة*

*غير ابو تركي ومثله وش حصيلي*

*جعل يفداهم مدورة البلاسة*

*واذكر انه كان للسطوة يميلي*

*جامعٍ للطيب مع عند وشراسة*

*مايهمه لا مدير ولا وكيلي*

*ينهرون ولا يزيد الا حماسة*

*ولا يداري عيلة انسانٍ يعيلي*

*من براسه حب يطحن حب راسه*

*وان نخيته باللقى ماهو بخيلي*

*ساس نخوة والرجل يرجع لساسة*

*والا انا رجال رايح في سبيلي*

*اقضي الايام في لعب ووناسة*

*مذهبي ماهو على مذهب خليلي*

*زاد ابو تركي عليَّه بالفراسة*

*وان نشدني قلت له هذا دليلي*

*الـ بنادم مايخذله قو باسه*

*كِبْر ابو تركي وهو قرمٍ مهيلي*

*وكل يوم تزيده الدنيا مراسة*

*يوم شبَّت قام يقدح بالفتيلي*

*والمعادي ماارعبه خيله وناسه*

*مير انا بختامها بسأل زميلي*

*هل تعود ايامنا مثل الدراسة*

*وهل نسيم فياضنا يرجع عليلي*

*وهل يطيب العود الاخضر من يباسة*

*او رجوع اللي يروِّح مستحيلي*

*خبّراللي خاطره زاد احتواسه*

***************
*رد الشاعر سعد المحمدي*

*ياولد براك ياحرز الذليلي*

*الكلام الزين يجبرك اقتباسه*

*الفخر ليه عسى عمرك طويلي*

*ياحزامي لاغطى نوري دماسه*

*في نهارن فيه رحال ونزيلي*

*تفرق العريف لوله من نحاسه*

*ماعلا شرواك يالشهم النبيلي*

*زود والدنيا تبي صبر وسياسه*

*وعن سوالك ياشبا السيف الصقيلي*

*يوم ماب وجيه خلق الله عباسه*

*لاذكرته جاب ياصالح حصيلي*

*وكن في عيني مثل شوك الهراسه*

*لو جبل ورقان يعلن بالرحيلي*

*مامضى مايعود والرحله عساسه*

*فيه من يكسبّها علمن جميلي*

*وفيه من يمشي بها مقلوب طاسه*

*من بغى للقوم بالفرجه دليلي*

*علمه لاجاك لايكبر مقاسه*

*يوم وخر راس قوم وحط ذيلي*

*من جهل يالقرم والا من نجاسه*

*اللسان اللي تقل خرطوم فيلي*

*ياعسى راعيه مايسمع حساسه*

*لاح براق المعاني بالمخيلي*

*واغرق الشاوي على طباخ فاسه*