ديوان الشاكر ابو سامي / قسم القصائد

حميد اللقماني الحربي
لفاني كلام الشاعر الحربي البيطار
ابو ناصر اللي هيض الفكر طاروقه

بيوت نظمها كنها غالي الاثمار
على روس حرب الشم ماهي بمدروقه

واباخذ معه سجه وابا خذ معه مشوار
وابحسب حساب الطرق والوقت وفروقه

يابو ناصر انت عالي القدر والمقدار
وشعرك جزيل ويسعد القلب ويشوقه

وعن مدح حرب ربوعنا مالنا معذار
وهي تستحق المدح بالوان منسوقه

ومن لا مدح ربعه يبا يلفت الانظار
ولو كان ولف له دواوين ممحوقه

وحنا ترانا مانعدل اليمين يسار
رجال عليها الحق ورجال محقوقه

ولا طبعنا بين البشر نفشي الاسرار
نقفل عليه السر في جوف صندوقه

كسبنا الثلاث البيض من دون مانحتار
يدينا على كسب المهات مطلوقه

ومنا صحابه ذكرهم خص بالايثار
كرم طيب نبل وحسن الاخلاق معشوقه

نزل عندنا المختار في هجرة الابرار
وكانت ضيافة تبري الجرح وفتوقه

ولنا وقفة محد وقفها بعد مادار
زمان القسى والدم في داخل عروقه

شيوخ لها وقفات في اليسر والاعسار
وكل القبايل تشهد وبرقه وروقه

قضاة العرب منا لهم شهرة الاقمار
بهم تضرب الامثال في الحكم وصدوقه

بني سالم ومسروح في ساير الاقطار
لهم وقفة بالمال والحال مرفوقه

وكل القبايل نعم فيهم وذا اللي صار
ذكرت القليل وباقي علوم مطبوقه

الاستاذ/ حميد سليم اللقماني


حمدان ع الحميد الحمراني:

بدئنا بذكر الواحد الخالق الغفار
كريم العطا اللي ينشئ المزن ويسوقه
بعدها اتخير واتنقى من الأشعار
كلام كما در المصاغير في ذوقه
سلايل سواحل حمر تشبه لهيب النار
صدوق الحيا تقطف زهوره وزملوقه
عليها الامان وحرب من دونها حضار
رجال الوفاء ماتنقض العهد وتبوقه
وحنا الحروب نكرم الجار والخطار
كسبنا الثلاث البيض ماجات مسروقه
نكمل حقوق الضيف ونعز قدر الجار
وندرا خوي الجنب ونكمل حقوقه
قبائل لنا فعل المكارم علم واشعار
ولنا امجاد في التاريخ ماهي بمسبوقه
نجازي هل الافعال بالصاع والقنطار
جزاء كل رجل حسب فعله ومنطوقه
ولا نشكي الشده لو الوقت حف وجار
وطيب الشراء والبيع تجار في سوقه
وكم سجل التاريخ عنا عبر واخبار
وراع الثناء مدحه نجي زود من فوقه
هزمنا جيوش الترك بالصارم البتار
وبارود نار فوقهم تشعل بروقه
ومن فعلنا كم ذاقو الصبر والامرار
كبود العداء لليوم بالنار محروقه
وطنا ودونه نرخص المال والاعمار
وهذي حقايق في السجلات موثوقه
ولا شك في كل القبايل رجال اخيار
لهم سابقه في المجد ماهي بملحوقه
ختام الكلام ازكى صلاتي على المختار
رسول الهدى اللي نور الكون بشروقه

الشاعر/ حمدان عبد الحميد الحمراني الحربي