مادرو عن بيره الجماء وغطاها

ياسلام الله سلامً يسعد الخاطر ويسره
كنه السحب العذيه لارعدت ثم جاك ماها
من هجوس الشاعر اللي يعرف اللولو ودره
ماتنازل للذهب واهل الذهب طيب نباها
لايازمان العجايب مختلط خيره وشره
والاوادم تختلف في يوم وليله وش بلاها
من تكلم فالحقيقه قالو في قلبه مضره
ومن ينافق في وجيه الناس محبوبً معاها
والدراهم ترفع الرجال وتزيده مسره
وتتبعه كل القوافل لو ماتحصل عشاها
والبلا في رجل صامت مايحب الهرج مره
اهرجوبه مادرو عن بيره الجماء وغطاها
مانعم الخلق ولانجرح قلوب. مستقره
فيه ناسً وافيه ربك رفع في مستواها
طيبهم مثل النجوم اللي تشاهد بالمجره
ماتغيرها نفوسً عاجزه تاصل سماها
لانضيق ولانكل ولانمل ولا نتشره
رزقنا عند الولي الناس ماندور رضاها
يارفيقي في زمانً مختلط خيره وشره
ابتسم واضحك وخل الناس تطحن في رحاها