ياشيب عيني من اللي ضايع عرفه / اللي هروج الحسود تغير أوضاعه

ياشيب عيني من اللي ضايع عرفه
اللي هروج الحسود تغير اوضاعه
نوب تعرفه وبعض احيان ماتعرفه
تقول مالله عطاه وزين اطباعه
عن المراجل تقول يديه منصرفه
ماله مع اهل الشكاله صيت وطماعه
مغير يطرد ورى التقصير ويغرفه
وياخذ من الذل شي يعجب اسماعه
ان حل في لازم عجل لك بظرفه
لو كان يسهل عليه ويقدر اسناعه
لكن راع الردى بين على جرفه
لو غير بهرجته من يصعب اقناعه
وش له بلبس الهدوم وحالته قرفه
ماله ومال الخبيث وهبدت كراعه
من يرخص النفس ماله عندنا صرفه
الا هجاد الرحيل ومدة شراعه
نطمس وجوده وننهي شوفه وعرفه
ونكنسل ارقام ابو جده ومرجاعه
من لاحسب للرجال حقوق في حرفه
لايبلش الناس في بلواه وأوجاعه

عبدالعزيز مناور الرويثي الحربي