للكيف حزة .. وللولايف مواعيد

قصيدة بعنوان :

للكيف حزة .. وللولايف مواعيد


بقلم / فواز بن محسن الزويهري الحربي

🌿🌿🌿🌿🌿🌿🌿🌿


للكيف حزة .. وللولايف مواعيد
وللقلب موال ن يعاود لحونه

وأهل الوفا تعرف دروب الأجاويد
ومن مد حبل الوصل ربعه يجونه

والحر ما ياطا وحُول المناقيد
ما دام في دربه تقدا بعيونه

كم شفتلي من ناس بيض واساويد
السود بيض افعال والبيض دونه

والظفر .. لو خاوى فوقته مقاريد
لا بد من طول البطا يقردونه

وخوة هل النخوة زحول الصناديد
تنومس الرجال وتسند متونه

ومن يصبر لصيده يجيب المفاريد
واللي تعجل للقماري ركونه

وترا المجامل زين وفيه المحاميد
وحلو النبا مكسب لمن يعرفونه

وبين الصراحة والوقاحة وضع قيد
أدرى على شعور العرب من طعونه

شاعر وادوِّر للثمر فالعناقيد
ولا هاضني برَّاق جيت لمزونه

〰〰〰〰〰〰〰〰