ما جيت لجل المال يا صاحب المال

هذي القصيدة قلتها عندما زرت احد الاشخاص وظن انني اريد منه مالا .
وقبل ان يعرف سبب مجيئي اليه بادر بالكلام وأخذ يلمح لي انه لا يملك مالا وانه مديون من كل اتجاه .


ما جيت لجل المال يا صاحب المال ......... ولا جيت أدور من يدنيك عطيه
ارتاح وريح بعد راحتكم البال ......... ماني من اللي يسأل الناس شيه
نفسي عزيزة تعشق العز بخبال ......... ما تنحني ساعة ورب البريه
وابغى أعدد لك لها عدة خصال ......... اسمع بعض ميزات نفسي الابيه
الخصله الاولى لها ترفض المال ......... اللي يجيها من يدينٍ رديه
تقتاد في قول النبي ساعةٍ قال ......... الخير كله في ذراعٍ عليه
استعفف الله يعفك بكل الاحوال ......... وشروط نفس الحر تصبح غنيه
في اصلها وفي فعلها حتى الأقوال ....... وغنى النفوس بكل حرٍ سجيه
والثانية تصبر ولو صبرها طال .......... على المآسي القاسيات القويه
وتواجه الاخطار في قلب الابطال .......... مثل الخوي اللي يقابل خويه
وترى الفقر مايجبر النفس تشتال .......... من الرجال الزاد وعندي يديه
وماهي ذليله لجل تطلب وتحتال .......... والله يعلم كم نفسي عصيه
والثالثة. صلبه وحمالة اثقال ..........وما توقف بموقف هزيل وضحيه
وتصمد اذا الأقدار أتبدل الحال .......... ولكل وضعٍ تنتهض وتهيا
رفعة ملوك وعزة الصحب والآل .......... واذلالها قبله حبال المنيه
ان شفتني بوضعٍ ضعيفٍ ومعتال .......... والدهر يمطر بالمصايب عليا
وبوجهي البيبان تقفل بالاقفال .......... وكل الدروب اللي أجيها خليه
وأني فقدت أعمامنا حتى الأخوال .......... ومالي قبيلة بالمواقف قويه
وراح السند من كان مضرب للأمثال ........ اللي يضللني عن الشمس فيّه
وان شفتني متردي بكل الأحوال ........ لا تحسب أني ارتضي بالدنيه
هيهات تبصرها وانا بقلب رجال ........ اشيلها ونفسي عليها رضيه
ياما تحملنا النوازل والأهوال ........ لين أصبحت كل النوازل سويه
وأختامهم فقري فقر قلة المال ........ لكن. غنيٍ بالخصال الابيه