فرق العقول .....نايف بن مياس

.
.
اصدورنا من ضيقة الوقت عانت
وقلوبنا من صبرها ماتملي
وعيون فيها دمعة الحزن بانت
لو تحتفظ بدموعها ماتهلي
وابدي مشاعر ماضي الوقت كانت
تعكس شعور الخاطر المسفهلي
سود الليالي رافقتني ومانت
حتى وقعت بماقع الفخ كلي
وان لاح لي خيط الاماني وزانت
اقفت علي بخيطها من محلي
واليوم دقت ساعة الصفر حانت
اربع جهات مقفله وين اولي
خطاي رجلي بالضروف استهانت
واليوم لاوجهتها ماتدلي
حتى نفوس الاجوديين شانت
واصحابي اللي بين زولي وضلي
حتى اصدقاي اللي على العهد خانت
احسنهم اللي دوب عينه تطلي
تقل انهم يوم النفوس استكانت
لا اقفى من الذيب القطيع المفلي
وانا يميني باليسار استعانت
مامال بي حمل المقادير ملي
مالين لو روس الرياجيل لانت
حتى السفيه بقدرنا مايزلي
بعض الرجال اليوم عني توانت
لو فاقني في طول جسمي وجلي
وإلا العقول الرازنه ماتعانت
وقدره بقدر اللي بقدره يهلي

نايف بن مياس الفريدي
.
.
.