ديوان الشاعر / خالد عبيد بن معتوق الاحمدي ( صقر المراقيب )

( ياسامعٍ كل نجوى )

لله شكواي ترفع=من بامره الشّر يدفع
يغفر ذنوبي ويشفع=( ويلطف بحالي وياوي)
ياسامعٍ كلّ نجوى=يامنتهى كلّ شكوى
يافراجٍ كلّ بلوى=(ماتخيب فيك الرّجاوي)
عبدك من ارض المدينه=يدعي ويرفع يدينه
طالبك فضل وسكينه=(ونجّيه كلّ البلاوي)
وانت العدل في قضائك=في ارضك وفي سمائك
ياليت نكسب رضائك=(واللي رحمته غناوي)
عبدك مقدرّ مصيره=وقسمتك للعبد خيره
ولاتاخذه بالجريره=( وتعلم وش المرء ناوي)
سبّوح قدّوس منّان=ياخالق الانس والجان
لجل العباده يارحمان=(يامنزل الغيث راوي)
ولحنا عبدناك ياالله=حقّ العبادات والله
لاكنّ عفوك لشفناه=(نلقى به الخير ضاوي)
افرج هموم الذي شاف=فالوقت ميلات واخلاف
ولاجاته النّاس بانصاف=( عايش حياته خلاوي)
لويشتكي من همومه= النّاس فيها تلومه
ولحدٍ يعاقب ظلومه=(والميل حال الشّقاوي)
والمرء وان قلّ ماله=حاله عليها مياله
ومحد ايتلذّذ دلاله=(وتكثر عليه المساوي)
ماتصدقّ النّاس قوله=ولا ودّها تشوف زوله
لوهو زعيم الرّجوله=(منبوذ ماله مخاوي)
والقاف جبته لغايه=فبدايته والنّهايه
طالبك منك الهدايه=(تهدي بها كلّ غاوي)
واطلبك ميتة شهاده=على ثبات وعباده
ترضيك عنّي زياده=(وتغفر ذنوب الهواوي)
ولاتخزنا يوم نحشر=في يومٍ اصعيب واقشر
يظهر به الخير والشّر=(وفيه اقتصاص ودعاوي)
وصلّي على اللي يحبّك=وانت اصطفيته بحبّك
وايحب منهو محبّك=( ذكره دوى يالمداوي )

الشّاعر / خالد بن عبيد بن معتوق ألأحمدي