ردي على الشاعر تركي العوفي

السلام عليكم ورحمة الله وبركاته اسعد الله صباحكم بالخير والعافية

يسعدني ويشرفني ان اطرح بين يديكم هذه القصيدة والتي وجهتها
لاخي العزيز الشاعر القدير / نداء الغيداني

علق بسقف الذاكرة صورة وراح = ضمن بها حرمان عيني من النوم
يا وجد حالي يا ندا وجد من طاح = خلف التوالي منكفين(ن) من القوم
بخزايز(ن) ما بين خلفات ولقاح = منقوح غدر وقفو والقفو مذموم
زلت عن النباض وتمثنت وشاح = جاشه وطاح من العبيه هكاليوم
صويب لا حي(ن) ولا ميت ارتاح = مثله من الثنين معطى ومحروم
خلاني اللي بالمظاليل ذباح = غرون(ن) مظاليله بها الموت ملحوم
غرون(ن) غمرني بالمحبه والأفراح = واسقاني كاس الخمر والجمر مزموم
لعيونه وساجيه وجدايل(ن) ماح = غفرت للايام والحظ معلوم
لحظة تمازج يا نداء انفاس وارواح = يا ويل حالي يا نداء كنها حلوم
ابغمرة الفرحه طلع نجم الأتراح = وليومك ابدربه وانا اطيح واقوم
نزل بنا حكم المقاسيم وانزاح = وش حيلة اللي يابيض الوجه مكلوم

الشاعر تركي العوفي


وهذا ردي المتواضع على قصيدة الشاعر القدير تركي العوفي

عن صاحبك نحتاج لشوية ايضاح=من شان نقراْ علوم وندون علوم
كانه يبى المرواح فالصبر مفتاح=اصبر على ماجاك من حزن وهموم
جعله مراح اللي دعوله بلمواح=وشلع يبى مجناه مايتبع الحوم
كانه على الروحه صمل ظبي الابراح=في حب هذا مانت مجبر وملزوم
وكانه على ماصار مجبور ياصاح=في سبة الحرمان مايلحقه لوم
غصب عليه يروح لو صاح لو ناح=يسكت ولو قلبه من البعد ماسوم
مافي يده للمشكله حل واصلاح=يخضع تحت مبدا تقاليد واسلوم
الغالي اللي زاح حتى ولو زاح=البعد مايثني رجل عنده عزوم
الحب لامنه غزا القلب واجتاح=مشاعر الانسان في ليله ويوم
يصبر عليه اللي للاسرار ماباح=يرجي الفرج لو طال والسد مكتوم
وكان الامل في جوكم بارقه لاح=هذا هو المطلوب والوضع محسوم
بعض الرموز تسد عن بعض الافصاح=وبيني وبينك مبهم الرمز مفهوم

نداء الغيداني


طبعا الرد تم في حينه على ابو فيصل ولكن المعذره على تاخير نشره