ديوان الشاعر عبدالملك الرحيلي

والله ووالله ثـــم والله ووالله=ما أعنيك أنا مشغول مالي ومالك
إدرى القسـم بالله لا تستقـلّـه=لايجرمك شنآن سـوء إحتمالـك
وإن كان ماصدّقتني فيـك علّـه=علل وحللني على مـا بـدا لـك
ترى وهبت النبض والقلب كلّـه=للّي أسرني ليـت ريّحـت بالـك
كلّه وفاء له والوفاء فـيْ جبلّـه=إن أقبلـت ولا تـوارت رحالـك
إرجع لرشدك وإرتقـي مستغلّـه=لاتتبـع أوهامـك وتنبـذ مآلـك
هذاك مامثلـه مـن الغيـد للّـه=مير إستريح وهدّني من خيالـك
نجم وعبث إنك تحـاول تصلّـه=حبيت أنوّه لو طرى ماطرى لـك
أبحتفـظ فـي ياسمينـه وفُلّـه=خايف عليه إمن الحسد طاب فالك
وأعد خصلـه واحـده مستجلّـه=في ناظري تسوى عظايم خصالك
يفوح مـن ليلـه إذا قـام فَلّـه=عطر يغمرني بالسعاده لذا لـك!
قـلْ للمعنّـى لا يوهّقـك قـلّـه=يموت في سيده ومالـه ومالـك