( مامعه جنّيه ولا فيه جنّي )..إلى القدير / فوّاز الزّويهري

/
/
/
/
/
/
/
/
/
/
/
/
/
/
هذه القصيده اوجّهها إلى القدير/ فوّاز بن محسن الزّويهري
بعد جرا بيني وبينه اتصال وسمّعني صوت الشّاعر القدير/ عبدالعزيز الزّويهري
وهو يغنّي الكسره بصوت اقل مايقال عنه انه جميل ورائع ماشاء الله عليه
وتحدث معي ابو بتال وقال لي انا معجب في شاعريتك
واقول كيف تجد الوقت اللي تنظم فيه القصايد
وبعد ساعه من المكالمه ارسلت لهم هذه القصيده اتمنى ان تنال إعجابكم

اسمع يابو محسن ورحّب وثنّي=جالك سلامي يرتفع بالمقامي
وآخصّ بن عمّك عسى مايونّي =عزيز واسمه من عزيز الاسامي
ماعشت لحظه شفت فيها تهنّي=مثل الذي فيها مدح لي كلامي
يوم ان ابو بتّال مدحه وصلني=عبر الاثير اوحيه ماهو بامامي
من بعد لنّه جرّ قافه يغنّي=كسره تهيّض قلب راع الغرامي
صادق شعوره يبدي الرّاي عنّي=يمدح ويثني والصّدوق العصامي
ماهو مجامل دام ممشاه قنّي=وانا اتشرّف بالرّجال الكرامي
وبشعور صادق ماهو منّي تمنّي=كلّي سعد وسرور ماني بكامي
واستغرب المطنوخ بالوضع لنّي=انظم قصيد بسرع سبق السّهامي
وآجاوبه باللي ضميري يكنّي=واقول صاحبكم بعيد المرامي
مامعه جنّيه ولافيه جنّي=مرّ بتجارب مرّها مرّ حامي
له عين يالاجواد ماترجهنّي=تجبر هواجيسه تخوض بهيامي
الوقت عنّاني وانا به معنّي=عشت الحياه بدور فلم ٍ درامي
دنياك واعرفها دنيّه تدنّي=اللي عشقها قل عليه السّلامي
والوقت مايل مختلف فيه ضنّي=لنّه حرمني من حسين القوامي
ذاك الكحيل اللي لدينه محنّي=عليه عين المبتلي ماتنامي

الشّاعر / خالد بن عبيد بن معتوق ألأحمدي