ياليتني حدر القدم لامشيتي - عنك اتلـقـّى وخزة الشوك بالقاع

ياطيّبه لو في يدي ماشقيتي=ولاتلقـّـيتي غرابيل واوجاع
مع كل زفرة ضيم لو ماشكيتي=يفز قلبي من ورى حدب الاضلاع
ياليتني حدر القدم لامشيتي=عنك اتلقــّـى وخزة الشوك بالقاع
أو ليتني عدْ الروى لاضميتي=واسقيك من دمي لو ان العمر ضاع
وارويك يا ام الطيب يانور بيتي=لين الزمن لرضاك يخضع وينصاع
لو يوم فيني بالحياه انتخيتي=لجيك كلي سايق الروح فزاع
يشهد رفيع الشان ساعة بكيتي=عقلي قبل دمعي من الواقعه ضاع
وافز من عز الكرى لاطريتي=ويضيق بالي وافقد العقل وارتاع
لو ان بي واللي جرى مادريتي=ولادرى مخلوق من كل الاصقاع
بيني وبيني عبرتي لاغفيتي=وانوح ليلي والجدى بس الارجاع
حكم الله المعبود كان اهتديتي=باكر يرد الحال وتزين الاوضاع
حكمه ولو به جازعه مارضيتي=ماغير حكمه نافذ الامر ومطاع
وان مر يوم وبالحياه اشتكيتي=شكوى لغير الله ترى مالها داع
عليه لحّـي بالطلب لادعيتي=منه الفرج والوقت لو زان خدّاع
والشاهد الله كان مني غديتي=غديت بالدنيا ولالي بها اطماع