الى القدير صقر المراقيب والمجال مفتوح للجميع واتشرف

الله من همٍ معاية له سنين = والله من صبرٍ تجاوز حدوده
همٍ محاوطني كما صور بكين = سيلٍ وعيت لاترده سدوده
صابر ومترجي يزيل القسا لين = مير القسا طول وطالت مدوده
الجيم ماحصلت ياصقر له سين = والهم قايدني ولا قدر اقوده
الناس من حولي وانا اخوك ممسين = وانا وجودي تايهٍ في وجوده
ارقد ليا كان المخاليق صاحين = واسهر وغيري مهتني في رقوده
مادري علامي حايرٍ بين قوسين = والكل منهم يم الآخر يقوده
الحر مايحتاج ياصقر تبين = وانت صقر والصقر عالي وروده
اتغير العالم بعد عام الالفين = وامة محمد بحرها في ركوده
كانوا منول واحد وصارو ثنين = راحوا مراح مقيط من دون عوده
وقتٍ تغير فيه كل الموازين = وقت اختلط بيضه مع ايام سوده
فيه العرب نسيوا قضية فلسطين = والقدس فيها تحت حكمة يهوده
واحنا بثورات العرب عنه لاهين = لين الحسود اخرج من العين عوده
البعض منا عن بعض صار مقفين = والبعض مرسل يم بعضه وقوده
ذا حالنا والله على حالنا يعين = كثرة ولكن كثرة بدون جوده