المسابقة الثانية

حبيبي لو نويت تغيب ليله=ترى يا للأسف مالك وسيله
فراقي صعب جدا يا حبيبي= ومن يقوى على هجر الأصيله ؟
تغيب شهور واياام وليالي= وبن الشوق مخلوط ٍ بهيله
وحالك ضايق ٍ والخافي أعظم= وحملك ما قدر متنك يشيله
علامات الأسى من فوق خدك= كأنك شايب ٍ ما فيه حيله
قسم بالله ما تقدر فراقي= ولا تلقى أبد مثلي حليله
أبادلك الغرام بقلب صادق=وتكحّلك العيون اللي كحيله
ويحرسك الهدب من كل عاذل= ولو ماله ترى غير الفشيله
واذا ضاقت عليك الأرض دايم=ترى قلبي هو اللي تشتكيله
اغطيك بحنان الكون كله= إلين الهم من قلبك أزيله
وعنوان القصايد فيك وحدك= ولو عارض على قولي قبيله
أحطك في صدر بيتي وعجزه=واصخر لك بيوت ٍ مستحيله
وأحطك في كتاباتي ونثري= واحطك في مقالات ٍ جميله
واحطك وين مدري وين احطك= بوسط القلب ؟ لا والله قليله
لاني من كثر شوقي وحبي =فمهما قلت احس اني بخيله
فلا تنوي تغيب اليوم عني=لانك للإسف مالك وسيله

على لحن الوجود اللي يبي له=حضور ومفرداتٍ مستحيله
سلام يوقّره كل عاقل=مجال الشك لايمكن يجي له
على مهر الحصان اللي مؤصل=أبوه وشدّني يمّه صهيله
لأنك في عيوني مثل إختي=وجسّاس يتفاخر بالجليله
يقدّم لأجلها ماله وحاله=إذا حمْي الوطيس وشْد حيله
عسى الله يحرسك من كل حاسد=ويبعد عنْك أصحاب الرذيله
ويحفظْ لك حبيبٍ تعشقينه=لأن الفانيه جدْاً ضئيله
وإذا ناور وشاور فيك نفسه=على أنه بس يلقى لك بديله
ورب البيت مايفقه ولا هو=من اللي يستحقون الأصيله
أنا والله ما أعرفك ولكن=ردودك تنسبك لأهل الفضيله
فراسه والفراسه فيْ فطره=على نهج الرجال أهل الجميله
ولا أرجي منك لو حتى ثنائك=لأن القلب يخشى من نزيله
ماهوب خوف لكن عهد قاطع=على نفسي خذيته في سبيله
لأن الحب لو له وصف ممكن=أنا أشهد إنها هي سلسبيله
أنا آسف على مجارات شعرك=لو إني قلت لك مافيك حيله

عبدالملك الرحيلي